ඉතා සූක්ෂම අයුරින් මුදල් වංචා පුද්ගලයන් 5 දෙනෙක් අත්අඩංගුවට

 අන්තර් ජාලය හා ෆේස්බුක් භාවිතා කරමින් විදේශ ගතව සිටින ශ්‍රී ලාංකික පුද්ගලයින්  හට සහනදායි පොලී අනුපාත යටතේ ණය ලබා දෙන බව පවසා ඉතා සූක්ෂම අයුරින් මුදල් වංචා කිරීමේ යෙදුණු පුද්ගලයන් 5 දෙනෙක් කූඨ ලේඛන හා උපකරණ  සමග අත්අඩංගුවට ගත්  බව  කිරුලපන පොලිසිය පවසයි.
එම සැකකරුවන් සමග මෙම ජාවාරම සඳහා යොදාගත් මෝටර් රථයක් වෑන් රථයක් ලැප්ටොප් පරිගණක 11 ක් ලැමිනේටින් මැෂින් 2 ක් රියදුරු බලපත්‍ර මුද්‍රණය සඳහා යොදා ගන්නා කාඩ්පත් 925 ක් ව්‍යාජ රබර් මුද්‍රා දෙකක් ව්‍යාජ  රියදුරු බලපත්‍ර 61 ක් සහ ජාත්‍යන්තර රියදුරු බලපත්‍ර පහක් පොලිස් භාරයට දත් බව ද පොලීසිය පැවසීය.
 කොරෝනා වසන්ගතය හේතුවෙන් විදෙස් ගත ශ්‍රමිකයන් සඳහා සියයට 2.7 සහනදායී පොලී අනුපාතයක් යටතේ  ණය ලබාදෙන බව  ජනාධිපති ලේකම් කාර්යාලයේ සහ මුදල් අමාත්‍යාංශයේ ශීර්ෂ ඇතුළත් ලිපි භාවිතා කර  මුහුණු පොත හරහා දැන්වීම් පළ කර මෙම ජාවාරම සිදුකර තිබූ බව පොලිසිය පැවසීය.
       එම ලිපියේ දුරකථන අංක දෙකක් සඳහන් කර ඊට අමතා වැඩි විස්තර ලබා ගන්නා ලෙස එම ලිපියේ වැඩිදුරටත් සඳහන් කර තිබූ බව පොලිසිය කියයි.
      රුපියල් ලක්ෂ පහක මුදලක් තැන්පත් කර  මෙම ජාවාරම සඳහා හසු වූ කළුබෝවිල ප්‍රදේශයේ කාන්තාවක් කිරුළපන පොලිසියට කරන ලද පැමිණිල්ලක් අනුව පරීක්ෂණ පවත්වා මෙම ජාවාරමට සම්බන්ධ සැකකරුවන් පිරිස අත්අඩංගුවට ගත් බවද පොලිසිය පැවසීය.
       තමන් ඉල්ලුම් කරන ණය මුදලින් සියයට දහයක් මුදලක් බැංකුවක තැන්පත් කරන ලෙසත් එම ගිණුම ඔන්ලයින් මගින් ආරම්භ කරන ලෙසත් මෙම ජාවාරම්කරුවන්  විදේශගත ශ්‍රමිකයන්ට පවසා මෙම ජාවාරම කලක සිට කරගෙන ගොස් ඇති බව පොලිසිය කියයි .
         ලබා ගැනීමට නියමිත ණය මුදල වෙනුවෙන් සීයට දහයක මුදල් තැන්පතුවක් මෙම පුද්ගලයන්ගේ ගිණුම්වල  තැන්පත් කළ බව මොවුන්ගේ ජාවාරමට හසුවූ විදේශ ශ්‍රමිකයන් පැවසීමෙන් අනතුරුව දින කිහිපයක් තුළදී  ඔවුන් අමතා ඔවුන්ගේ ණය මුදල අනුමත වී ඇති බව පවසන මෙම ජාවාරම්කරුවන්  එම ණය මුදල ඉතිරි  වැඩ ඉක්මනින්  කර දීම සඳහා රහස් අංකය ඉතා උපක්‍රමශීලී ඉල්ලාගෙන තත්පර කිහිපයක් තුළදී එම ණය හිමිකරුවන් තැන්පත් කළ සියයට 10 ක මුදල  වංචා සහගතව ලබා ගන්නා බව පොලිස් විමර්ශන වලදී  අනාවරණය කර ගත් බවත් පොලීසිය පැවසීය.
     අත්අඩංගුවට ගත් සැකකරුවන් වයස අවුරුදු 30 සහ 46 අතර පසුවන පුද්ගලයින් බවත් මාතර, පිටබැද්දර, නාරාහේන්පිට හා වැල්ලම්පිටිය ප්‍රදේශ වල පදිංචිකරුවන් බවද පොලීසිය පැවසීය.
        සැකකරුවන්  අලුත්කඩේ අංක 3 අධිකරණයට ඉදිරිපත් කිරීමට නියමිතය
       බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාගේ උපදෙස් මත කිරුළපන පොලීසියේ ස්ථානාධිපති ප්‍රධාන පොලිස් පරීක්ෂක චන්දන කලුආරච්චි අපරාධ අංශයේ ස්ථානාධිපති ප්‍රදීප් එදිරිවීර උප පොලිස් පරීක්ෂක චානුක ජයවීර සැරයන්වරුන් වන 9233 ජයවීර, 37060 සනත් ,66151 කරුණානායක ,61413 සුරංග ,කොස්තාපල්වරුන් වන 70225 කපිල ,71943  බණ්ඩාර ,78686 අරුණ ,30574 රන්දික ,37780 විජේතුංග ,64485 සමීර ,82458 බණ්ඩාරනායක , කාන්තා පොලිස් කොස්තාපල් 10133 දීපානි මහත්ම මහත්මීහු පරීක්ෂණ පවත්වයි.
සමීර අබේසිංහ – බොරලැස්ගමුව

Related posts

Leave a Comment