ගල් සිදුරු කර නිදන් සොයයි

එප්පාවල පොලිස් වසමේ ඇදගල වෙහෙරගල ප්‍රදේශයේ පිහිටි අධි පුරාවිද්‍යා වටිනාකමකින් යුතු වෙහෙරගල පුරාණ රජමහා විහාරයේ ගල්තලාවක් සිදුරුකර නිදන් සෙවීමට උත්සහ කළ පිරිසක් අත්අඩංගුවට ගැනීම සදහා එප්පාවල පොලිසිය හා අනුරාධපුර කොට්ඨාශ පුරාවිද්‍යා ආරක්ෂන විශේෂ පොලිස් ඒකකය විශේෂ පරික්ෂණයක් අරඹා තිබේ.

පොලිස් කණ්ඩායමට ලැබුණු තොරතුරකට අනුව අදාල රජමහා විහාරස්ථාන භූමිය පොලිස් කණ්ඩායම විසින් පරික්ෂා කිරිමේදි විහාරස්ථානයට මීටර් සියයක් පමණ දුරින් පිහිටි විශාල කළුගල් තලාව විද පුපුරවා හැරීමට කිසියම් පිරිසක් උත්සහ දරා තිබෙනා බව පොලිසිය පවසයි.

විහාරස්ථාන භූමියේ නිදන් වස්තු තිබෙනා බවට ජනප්‍රවාදයේ සදහන්වීම නිසා විවිධ පුද්ගලයන් එම ස්ථානය විනාශ කිරීමට පෙළඹි ඇති බව පොලිසිය පවසයි.සිද්ධිය සම්බන්ධයෙන් ප්‍රකාශයක් ලබාදෙන ලෙස විහාරස්ථානයේ නායක හිමිපානන්ට පොලිසිය දන්වා ඇතත් උන්වහන්සේ පොලිසිය මගහරිමින් සිටිනා බවක් නිරික්ෂණය වන බව පොලිසිය පැවසුවේය.

මීට දින කිහිපයකට ඉහතදි කිසියම් කණ්ඩායමක් නවීන ගල් විදින යන්ත්‍රයක් උපයෝගි කරගෙන විශාල කළුගල් තලාවේ ස්ථාන හතක් අගල් හතර බැගින් විද තිබෙනා බව පොලිසිය පැවසුවේය.

ගල විදීමෙන් පසුව ඒවාට වෙඩි බෙහෙත් පුරවා ස්ථානය පුපුරුවා හරින්ට උත්සහ කරන්නට ඇති බවට පොලිසිය සැකකරනා අතර විහාරාධිපති හිමියන් හා විහාරස්ථ දායක සභාව නොදැන එම ස්ථානයේ කිසිවක් කිසිවෙකුට රහසිගතව සිදුකළ නොහැකි බව පොලිසිය පවසයි.

රජමහා විහාරස්ථානයේ ඇතැම් ගොඩනැගිලි පුරාවිද්‍යාවේ කිසිදු අවසරයකින් තොරව ඉදිකර තිබෙනා බවත් මල් පාත්ති සැකසීමට සිදුකළ පොලව කැනීමකදි පැරණි ගඩොල් විශාල ප්‍රමාණයක් හමුවි තිබෙනා බව පොලිසිය පවසයි.

විහාරස්ථාන භූමිය පුරා කළු ගලින් නෙළන ලද ගල් කණු බුද්ධ ප්‍රතිමා ඇතුළු පුරාවිද්‍යාත්මක සාධක රැසක් දක්නට තිබෙනා බව පවසන පොලිසිය පුරාවිද්‍යාත්මක ස්ථානය සංරක්ෂණයට කිසිවෙකුත් මැදිහත්වි නැති බව පවසයි.

විශාල කළුගල් බුද්ධ ප්‍රතිමාවක් විහාරාධිපති හිමියන් විසින් තිබූ ස්ථානයෙන් වෙනත් ස්ථානයකට බැකෝ යන්ත්‍රයක් ආධාරයෙන් රැගෙන ගොස් ඇති බවත් සිදුකළ පරික්ෂණ වලදි අනාවරණවි තිබුණි.මීට පෙරත් විහාරස්ථාන භූමියේ ඇති පුරාවිද්‍යා ස්ථානවල විවිධ පුද්ගලයන් කැනීම් සිදුකිරීමට විශාල උත්සහයක නිරතවි ඇති බවට සාක්ෂි රැසක් හමුවි තිබෙනා බව පොලිසිය පවසයි.

පුරාවිද්‍යා භූමියට සිදුකර තිබෙන හානි සම්බන්ධයෙන් වගකිව යුතු සැකකරුවන් කඩිනමින් අත්අඩංගුවට ගෙන අධිකරණයට ඉදිරිපත් කරනා බව පරික්ෂණ සිදුකරනා පොලිසිය පවසයි.

එප්පාවල පොලිසියේ ස්ථානාධිපති ප්‍රධාන පොලිස් පරික්ෂක ඒ.පී.පී රෝහණ අධිකාරි පුරාවිද්‍යා ආරක්ෂන විශේෂ පොලිස් ඒකකයේ ස්ථානාධිපති ඩබ්.එම්.ඩබ්ලිව් ඇල්ලේපොල පොලිස් සැරයන් 36446 සෙනරත් බණ්ඩාර වීරකෝන් ඇතුළු නිලධාරින් පිරිසක් සිද්ධිය පිළිබදව පරික්ෂණ සිදුකරති.

අනුරාධපුර – මහේෂ් විජේසුරිය

Related posts