ස්ටාර් ගාමන්ට්ස් සමූහයේ එකොළොස්වන කර්මාන්තශාලාව බුත්තලට

ප්‍රමුඛ‍ පෙළේ ජාත්‍යන්තර ඇඟළුම් නිෂ්පාදන සමාගම් සමූහයක් වන ස්ටාර් ගාමන්ට්ස් සමූහය (‘Star’) අති නවීන තාක්ෂණයෙන් සවිබලගැන්වූ ඔවුන්ගේ නවතම කර්මාන්තශාලාව මොණරාගල දිස්ත්‍රික්කයේ බුත්තල දී පසුගියදා විවෘත කරන ලදී.

ශ්‍රී ලංකාවේ ප්‍රාදේශීය ආර්ථිකයන් සංවර්ධනය වෙනුවෙන් සහයෝගය ලබා දීමේ දැක්ම මූලික කරගනිමින් මෙම ස්ටාර් ගාමන්ට් කර්මාන්තශාලාව විවෘත කිරීමට කටයුතු කර ඇත. ශ්‍රී ලංකාව තුළ පවත්වාගෙන යන ස්ටාර් ගාමන්ට් සමූහයට එක්වන එකොළොස් වැනි කර්මාන්ත ශාලාව වන මෙය 1,000කට වැඩි පිරිසකට රැකියා අවස්ථා නිර්මාණය කරදී තිබේ.

ඇඟළුම් කර්මාන්තශාලාවක් සතුව තිබිය යුතු අති නවීන යටිතල පහසුකම් හා තාක්ෂණයෙන් බුත්තල ස්ටාර් ගාමන්ට් කර්මාන්ත ශාලාව සවිබල ගන්වා තිබෙන අතර, ලෝකයේ කීර්තිමත් ඇඟළුම් සන්නාමයන් සඳහා knit clothing නිෂ්පාදන සැපයීමට කටයුතු සිදු කරයි. මෙම ඇඟළුම් කර්මාන්තශාලාව මගින් සෑම මසකම රුපියල් මිලියන 60කට වැඩි සෘජු ආදායමක් දේශීය ප්‍රජාව වෙත ලැබෙන අතර, ඇමෙරිකන් ඩොලර් මිලියන 12කට ආසන්න අපනයන ආදායමක් වාර්ෂිකව උත්පාදනය කරනු ලබයි.

බුත්තල ස්ටාර් ගාමන්ට්ස් ඇඟළුම් කර්මාන්තශාලාව විවෘත කරමින් Komar සමාගමේ සභාපති හා ප්‍රධාන විධායක නිලධාරී චාර්ලි කොමාර් මහතා මෙසේ පවසා සිටියේය. “ශ්‍රී ලංකාවේ ඇඟළුම් කර්මාන්තයෙහි සංවර්ධනය වෙනුවෙන් අප දක්වන කැපවීම මෙවැනි ආයෝජන මගින් වැඩිදුරටත් තහවුරු කෙරෙනවා.

ඒ වගේම මෙරට ග්‍රාමීය ආර්ථික පසුබිම සවිබලගැන්වීමටද මෙවැනි ආයෝජන මගින් ලැබෙන්නේ විශාල දායකත්වයක්. ඇඟළුම් කර්මාන්තයෙහි අනාගතය වෙනුවෙන් මෙවැනි ආයෝජනයන් අත්‍යවශ්‍ය වන අතර ඒ සඳහා අපගේ දායකත්වය උපරිමව ලබා දෙන්නට හැකිවීම අපට ආඩම්බරයක්.

සාම්ප්‍රදායික චින්තනයෙන් බැහැර වෙමින් ඉදිරියට යන ප්‍රජාවන් හා සාර්ථක ව්‍යාපාරයන් ඇතිකිරීම වෙනුවෙන් දායකත්වය ලබා දීමට අපි මෙවැනි අභියෝගාත්මක ආයෝජනයන් සිදුකරන්නට පසුබට වන්නේ නෑ.”

ස්ටාර් සමාගම ශ්‍රී ලංකාවේ ඇඟළුම් කර්මාන්තයෙහි වර්ධනය වෙනුවෙන් ප්‍රබල දායකත්වයක් ලබා දෙන අතර, දශක හතරකට වැඩි කාලයක් ඇඟළුම් කර්මාන්තයට සම්බන්ධව කටයුතු කරන පළපුරුදු සමාගමකි.

ජාත්‍යන්තර මට්ටමේ ඇඟළුම් නිෂ්පාදනයෙහි හා බෙදා හැරීමෙහි නිරත සමාගමක් වශයෙන් මේ වන විට 8,000කට වැඩි ශ්‍රී ලාංකිකයින් පිරිසකට රැකියා අවස්ථා නිර්මාණය කරදී තිබෙන ස්ටාර් ගාමන්ට්ස් යනු මෙරට ක්‍රියාත්මක වඩාත් නව්‍යකරණ හා තිරසාර ව්‍යාපාරයකි.

සමාගමේ වර්ග අඩි 70,000ක නව්‍යකරණ මධ්‍යස්ථානය 2020 වර්ෂයේ පැවැති AIA New York’s annual Design Awards සම්මාන උළෙලෙහි කුසලතා සම්මානයෙන් පිදුම් ලැබීය.

අග්නිදිග ආසියානු කලාපයෙහි පළමු Passive House design නිර්මාණය වන්නේද එයයි. අද වන විට ස්ටාර් ගාමන්ට් ඇඟළුම් සමාගමේ කර්මාන්තශාලා 14 සඳහාම CarbonNeutral® සහතිකය ලබා ගෙන තිබෙන අතර, එය ශ්‍රී ලංකාවේ දැවැන්තම carbon neutral සමාගම බවටද පත්ව සිටී. තම සමූහ‍යට අයත් සෑම කර්මාන්තශාලාවක් සඳහාම ජාත්‍යන්තර carbon neutral සහතිකය හිමිව තිබෙන ශ්‍රී ලංකාවේ එකම ඇඟළුම් නිෂ්පාදන සමාගම වන්නේද ස්ටාර් ගාමන්ට්ස් ය.

ස්ටාර් ගාමන්ට්ස් සමූහයේ කළමනාකාර අධ්‍යක්ෂ – ඒ. සුකුමාරන් මහතා මේ අවස්ථාවේදී අදහස් දක්වමින් මෙසේ පවසා සිටියේය. “ශ්‍රී ලංකාවේ ඇඟළුම් කර්මාන්තයෙහි තිරසාර අනාගතය සඳහා නාගරික හෝ ග්‍රාමීය ප්‍රදේශ මෙන්ම කාර්මික උද්‍යාන යන කුමක් වුවත් අවශ්‍ය කරන යටිතල පහසුකම් ආදියෙන් සවිබලගැන්වීම අත්‍යවශ්‍ය බව අපි දකිනවා.

රටේ ආර්ථික වර්ධනයට ඉතා වැදගත් දායකත්වයක් ලබා දෙනවා. ඒ සම්බන්ධව අපගේ දැක්ම හා ක්‍රියාකාරීත්වය පෙන්නුම් කරන්නට බුත්තල නවතම කර්මාන්තශාලාව විවෘත කිරීම හොඳම උදාහරණයක් හැටියට ගෙනහැර දක්වන්න මම කැමතියි.”

ස්ටාර් ගාමන්ට්ස් යනු Komar සමූහයට අයත් ජාත්‍යන්තර ඇඟළුම් නිෂ්පාදන සමාගමක් වන අතර, නිදන ඇඳුම්, loungewear, සමීප ඇඟළුම් (intimates) හා layering products නිර්මාණ සැලසුම්කරණය, අලෙවිකරණය හා බෙදාහැරීමෙහි නිරත සමාගමකි. 1908 වර්ෂයේ ඇරඹි Komar සමාගම අද වන විට පුළුල් පරාසයක පැතිරුණු තමන්ගේම බලපත්‍රලාභී හා පුද්ගලික ලේබල් සන්නාම 100කට වැඩි සංඛ්‍යාවක් කළමනාකරණය කරයි.

Related posts