සුළි කුණා‍ටු තත්ත්වයට මුහුණ දීමට පෙරසූදානමක්

පවතින අයහපත් කාලගුණික තත්ත්වය හා ඉදිරි සුළි කුණා‍ටු තත්ත්වයට මුහුණ දීම සඳහා සියලුම රාජ්‍ය ආයතන පෙරසූදානම් ක්‍රියාමාර්ග ගෙන ඇති බවත් හදිසි තත්ත්වයක් ඇතිවුවහොත් මැදිරිගිරිය,ලංකාපුර හා වැලිකන්ද යන ප්‍රාදේශීය ලේකම් කොට්ටාශවල විශේෂයෙන් තාවකාලික ‍රැදවුම් මධ්‍යස්ථාන 09ක් හඳුනාගෙන අවශ්‍ය ක්‍රියාමාර්ග ගෙන ඇතැයි පොලොන්නරුව දිස්ත්‍රික් ලේකම් ඩබ්.ඒ.ධර්මසිරි මහතා පවසයි.

දිස්ත්‍රික් ලේකම්වරයා මේ බව පැවසුවේ අද (02) ඉදිරි සුළි කුණා‍ටු තත්ත්වයට පොලොන්නරුව දිස්ත්‍රික්කයේ පෙර සූදානම පිළිබඳව අප කළ විමසුමකට පිළිතුරු දෙමිණි.

“අපි මේ වන විට සියලුම ප්‍රාදේශීය ලේකම්වරුන් දැනුවත් කරලා තියෙනවා.අද දිනයේත් හෙට දිනයේත් රාත්‍රි කාලයෙත් ප්‍රාදේශීය ලේකම් කාර්යාල හා ආපදා සහන සේවා ඒකක ,ආපදා කළමනාකරණ ඒකක විවෘතව තබන්න කියලා.

නිවාස හානි සිදුවෙන්න පුළුවන් ස්ථාන හා ප්‍රදේශ හඳුනාගන්න ග්‍රාම නිලධාරීන් හරහා කටයුතු කළා.ඒ වගේම අද සවස් වීමට පෙර අවදානම් ස්ථානවල තිබෙන අනාරක්ෂිත ගස් කපා ඉවත් කරන්නත් දැව සංස්ථාවට හා ආපදා කළමනාකරණ ඒකකයට උපදෙස් දුන්නා.

පොලිසිය,සිවිල් ආරක්ෂක බලකාය,ත්‍රිවිධ හමුදාව වාරිමාර්ග දෙපාර්තමේන්තුව මේ පිළිබඳව සැලසුම් සහගත වැඩපිළිවෙලක් ක්‍රියාත්මක කරනවා.මිලි මීරට් 200කට වැඩි වර්ෂාපතනයක් ඇතිවිය හැකි බැවින් සියලුම ජලාශවල තත්ත්වය පිළිබඳව නිරන්තරයෙන් අවධානය යොමු කර තිබෙනවා.

අඹන්ග‍ඟෙන් පරාක්‍රම සමුද්‍රයට එන ජලය ලබා ගැනීම තාවකාලිකව නවතා දැමුවා.මොරගහකන්දෙන් ඇළහැර හරහා එන ජලයද තාවකාලිකව නවතා දැමුවා.

ඒවා මහවැලිගඟට මුදා හැරෙනවා.ගොවිජනසේවා දෙපාර්තමේන්තුව ලොකු ක්ඩුආ වැව්වල තත්ත්වය පරික්ෂා කර බලා කඩාගෙන යන වැව් තිබේ දැයි හඳුනාගෙන හදිසි තත්ත්වයක දි වැලිකොට්ට ගැසීමට හා අනෙකුත් අවශ්‍යතා සඳහා සූදානම්.

ඒ වගේම මේ සුළං ප්‍රවාහයෙන් වැඩි බලපෑමක් එල්ල වෙයි කියලා අනුමාන කරන මැදිරිගිරිය,ලංකාපුර හා වැලිකන්ද ප්‍රාදේශීය ලේකම් කොට්ටාශවල අවතැන් වුවහොත් ජනතාව තාවකාලිකව ‍රැදවීම සඳහා ආරක්ෂිත ස්ථාන 3 බැගින් ස්ථාන 09ක් සූදානම් කර තිබෙනවා.

ඊට අවස්‍ය සියලු පහසුකම් සූදානම්.පිසූ ආහාර, වියලි ආහාර ද්‍රව්‍ය ඇතුළු පහසුකම් සලසන්න උපදෙස් දීලා තියෙනවා.අපට නැගෙනහිර ආරක්ෂක සේනා මූලස්ථානය අවශ්‍ය සහයෝගය ලබා දෙනවා,දිස්ත්‍රික්කයේ ප්‍රාදේශීය ලේකම් කාර්යාල 7 ම රාත්‍රි කාලයේත් විවෘත කර තබන්න උපදෙස් දුන්නා.

ආපදා සහන සේවා හා ආපදා කළමනාකරණ ඒකක ඕනෑම තත්ත්වයකට සූදානම්” යැයි ද ඒ මහතා වැඩි දුරටත් පැවසීය.

මේ අතර පොලොන්නරුව දිස්ත්‍රි ආපදා කළමනාකරණ ඒකකයේ ප්‍රධානි සහකාර අධ්‍යක්ෂ උපුල් නානායක්කාර මහතා පැවසුවේ ප්‍රාදේශීය ලේකම් කොට්ටාශ 7 හිම හදිසි ආපදා අනුකණ්ඩ 07ක් ස්ථානගත කොට ඇති බවයි.

ඊෂා  මුදියන්සේ – පොලොන්නරුව

Related posts