Category: sinhala news

ග්ලයිෆොසෙට් තහනම ඉවත් කරමින් අද (08) දිනය තුළ ගැසට් නිවේදනයක් ප්‍රකාශයට පත් කිරීමට නියමිතයි. ග්ලයිෆොසෙට් ආනයනය කිරීම තහනම් කරමින් මුදල් අමාත්‍යාංශය 2015 වසරේදී තහනමක් පනවා තිබුණා. කෙසේ වෙතත් ආනයන පාලන බලපත්‍ර අවශ්‍යතාවට යටත්ව මේ මස 5 වනදා සිට ක්‍රියාත්මක වන පරිදි අදාළ තහනම ඉවත් කරමින් ආනයන අපනයන පාලක ජනරාල්වරිය විසින් අද දිනය තුළ ගැසට් නිවේදනය නිකුත් කිරීමට නියමිත බවයි වාර්තාවන්නේ.

දිනෙන් දින ඉහළ යන අපරාධ රැල්ලට ප්‍රධාන හේතුව රට තුළ පවතින ආර්ථික අර්බුදය සහ නීතියේ කඩාවැටීම බව අපරාධ විද්‍යාව පිළිබඳ විශේෂඥයින් පවසයි. ශ්‍රී ජයවර්ධනපුර විශ්ව විද්‍යාලයේ අපරාධ විද්‍යාව හා අපරාධ යුක්තිය පිළිබඳ අධ්‍යයන අංශයේ මහාචාර්ය නේරංජි විජේවර්ධන සඳහන් කළේ පොලීිසියේ ප්‍රධාන කාර්යභාරයන් වෙනුවට අතිරේක කාර්යයන් වැඩි වශයෙන් පැවරීම ද මෙවැනි තත්ත්වයන්ට හේතු වන බවයි. පවතින තත්ත්වයන් හමුවේ පොලීසියට අපරාධ විමර්ශනයන් සිදුකිරීමට වඩා වෙනත් කාර්යයන් පැවරීම හේතුවෙන් අපරාධකරුවන් එයින් ප්‍රයෝජන ගන්නා බවයි මෙහිදී වැඩිදුරටත් ප්‍රකාශ කෙරුණේ.

දිවයිනට බලපා ඇති අයහපත් කාලගුණ තත්ත්වය සැළකිල්ලට ගනිමින් තවදුරටත් දිස්ත්‍රික් 5ක් සඳහා නායයෑම් අනතුරු ඇඟවීමේ නිවේදනයක් නිකුත් කර තිබේ. ජාතික ගොඩනැගිලි පර්යේෂණ සංවිධානය සඳහන් කළේ, ඊයේ (07) පස්වරු 3 සිට අද (08) පස්වරු 3 දක්වා කාලය සඳහා බලපැවැත්වෙන පරිදි එම අනතුරු ඇඟවීමේ නිවේදනය නිකුත් කර ඇති බවය. ඒ අනුව හම්බන්තොට, මාතර, කෑගල්ල, නුවරඑළිය සහ රත්නපුර දිස්ත්‍රික්ක සඳහා එම නායයෑමේ අනතුරු ඇඟවීමේ නිවේදනය නිකුත් කර තිබේ.

මෙරටින් වාර්තා වන දෛනික කොවිඩ් ආසාදිතයින් සංඛ්‍යාව මේ වන විට 200 සීමාවට ආසන්න වී තිබේ. යළිත් වරක් කොවිඩ් අනුප්‍රභේද රට තුළ පැතිරයමින් පවතින බව පසුගිය දින කිහිපය තුළම සෞඛ්‍ය අංශ දැඩිව අවධාරණය කළේය. කෙසේවෙතත් ඊයේ (07) දිනයේ දි කොවිඩ් -19 ආසාදිතයින් 184 දෙනෙකු වාර්තා වී ඇති බව රජයේ ප්‍රවෘත්ති දෙපාර්තමේන්තුව සඳහන් කළේය. මෙම සියලු ආසාදිතයින් මෙරටින් හඳුනාගත් පුද්ගලයින් බවද එම දෙපාර්තමේන්තුව සඳහන් කළේය.

ජාතික ඉන්ධන බලපත්‍රය හෙවත් QR ක්‍රමවේදය යටතේ ඉන්ධන ලබාගැනීමේ දෙවන කෝටාව ඊයේ (07) මධ්‍යම රාත්‍රීයේ සිට ආරම්භ කෙරුණි. සෑම සතියකම ඉරිදා මධ්‍යම රාත්‍රීයේ මෙය යාවත්කාලීන කෙරෙන බව බලශක්ති අමාත්‍ය කංචන විජේසේකර මහතා සඳහන් කළේය. බලශක්ති අමාත්‍ය කංචන විජේසේකර මහතා සඳහන් කළේ, QR ක්‍රමවේදය යටතේ පසුගිය සතියේ ඉන්ධන ලබාදීමේ වැඩපිළිවෙල අතිශයින්ම සාර්ථක බවය. මේ සඳහා සහාය ලබාදුන් සියලු පාර්ශවයන්ට තමන් ස්තූතිය පළ කරන බවද ඔහු සිය ට්ව්ටර් පණිවුඩය මඟින් සඳහන් කර තිබේ.

ඔත්තු බලන්නකු ලෙස අපකීර්තියට ලක්වූ හම්බන්තොට වරායේ නැව්ගත කිරීමට නියමිතව තිබූ ‘යුවාන් වැන්ග් 5‘ නමැති චීන ලුහුබැඳීමේ යාත්‍රාව ආගමනය කල් දැමිය යුතු බවට ශ්‍රී ලංකාව සිකුරාදා ඉල්ලීමක් කළ අතර ඊට ප්‍රතිචාර දැක්වීමට පෙර චීන තානාපති කාර්යාලය චීන රජය අමතා ඒ සම්බන්ධ උපදෙස් ලබා ගන්නා බව ශ්‍රී ලංකාවට ඊයේ දන්වා ඇත. රාජ්‍ය තාන්ත්‍රික නිලධාරියාගේ ඉල්ලීම පරිදි ඊයේ පැවති කෙටි සාකච්ඡාවකදී චීන තානාපති Qi Zhenhong මහතා මේ බව ජනාධිපති රනිල් වික්‍රමසිංහ මහතා වෙත දැනුම් දුන් බව බලධාරී ආරංචි මාර්ග පවසයි. මෙම නැව නැව්ගත කිරීම ශ්‍රී ලංකාවට භූ දේශපාලන හිසරදයක් බවට පත්ව ඇත.…

කාබනික කෘෂිකර්ම ප්‍රතිපත්තියෙන් රජය කිසිවිටෙක ඉවත් නොවන බව කෘෂිකර්ම අමාත්‍ය මහින්ද අමරවීර මහතා පවසයි. ඒ අනුව ලබන මහ කන්නයේ වගා කරන කුඹුරුවලින් සියයට 30ක් කාබනික වගාවට යොදාගැනීම සඳහා මේ වන විටත් නිර්දේශ කර ඇති බව අමාත්‍යවරයා පෙන්වාදෙයි. ප්‍රමිතියෙන් යුතු කාබනික පොහොර ගොවි ජනතාවට ලබාදීමට පියවර ගන්නා අතර ප්‍රමිතිය පරීක්ෂා කිරීමකින් තොරව කිසිදු කාබනික පොහොර වර්ගයක් සඳහා අනුමැතිය ලබානොදීමට තීරණය කර ඇති බව මහින්ද අමරවීර අමාත්‍යවරයා සඳහන් කළේය. කාබනික වගාව රටට අත්‍යවශ්‍ය බව පෙන්වාදෙන කෘෂිකර්ම අමාත්‍යවරයා ලබන මහ කන්නයේ කාබනික වගාවේ යෙදෙන ගොවීන් සඳහා පොහොර මිලදී ගැනීමට පියවර ගන්නා බව වැඩිදුරටත්…