යන්ත්‍ර සූත්‍ර යොදාගෙන රන් ආභරණ සෙවු පොලිස් සෙබළෙකු මාට්ටූ

gold

රජසමයේ තැම්පත් කළ බව කියන රන් ආභරණ තොගයක් ඇති බවට කට්ටඩියෙකු පැවසීම නිසා ඒවා ගොඩගැනීමට විශාල කළුගල්තාලාවක යන්ත්‍ර සූත්‍ර යොදාගෙන සිදුරු කරමින් සිටි සේවයේ නියුතු යුදහමුදා විනයාරක්ෂක පොලිස් සෙබළෙකු ඇතුළු සිවුදෙනෙකු හිදෝගම පොලිසියේ රාත්‍රී මුර සංචාරයේ නිරතවු නිලධාරින් විසින් අත්අඩංගුවට ගෙන තිබේ.

හිදෝගම පොලිස් වසමේ 104 පහළ තුරුවිල පිහිටි කුණු ඇලට යාබදව පිහිටා ඇති ගල්තලාවේ කිසියම් පිරිසක් යන්ත්‍ර සූත්‍ර යොදා ගෙන කැනීමක් සිදුකරනා බවට පොලිස් හදිසි ඇමතුම් අංශයට ලැබුණු ඇමතුකමට අනුව පොලිස් කණ්ඩායම එහි ගොස් වැටලීම සිදුකර තිබුණි.

සැකකරුවන් සන්තකයේ තිබි ගල් උණුකරනා බව කියන රසායන ද්‍රව්‍ය කිලෝවක පමණ ප්‍රමාණයක් විදුලිය උත්පාදනය සදහා යොදාගත් ජෙනරේටරයක් අති නවීන ගල්විදුම් යන්ත්‍රයක් (හැමර්)යකඩ කටු මිටි හා පූජා භාණ්ඩ තොගයක් පොලිසිය සොයා අත්අඩංගුවට ගෙන තිබුණි.එම අවස්ථාව වනවිට අති නවින ගල් විදුම් යන්ත්‍රයක් යොදාගෙන සැකකරුවන් ගල්තලාවේ අගල් හතරක් පමණ ගැඹුරට විදතිබූ බව පොලිසිය පවසයි.

සැකකරුවන් සිවුදෙනා අතරින් තිදෙනෙකු වැටලීම සිදුකළ අවස්ථාවේ අත්අඩංගුවට පත්වි තිබූ අතර කට්ටඩියා යැයි කියන පුද්ගලයා පොලිස් ග්‍රහණයෙන් මිදි පලාගොස් තිබුණත් ඔහුව ඊයේ (7දා) උදෑසන පොලිසිය අත්අඩංගුවට ගෙන තිබුණි.

ඉඩමේ හිමිකරුවන පුද්ගලයාගේ නිවසට පිටුපසින් කුඹුරු යාය පිහිටා තිබෙන බවත් ඊට යාබදව ඇති කුණු ඇලෙන් එගොඩ නිධානයක් තිබෙනා බව කියනා විශාල ගල්තලාවක් තිබෙනා බවත් පොලිසිය පවසයි.

සැකකරුවන් අතර සිටින අනුරාධපුර මල්අතු ඔය ප්‍රදේශයේ පදිංචි කට්ටඩියෙකු යැයි කියන පුද්ගලයා අදාල ස්ථානය පරික්ෂාකර විශාල රන් ආභරණ තොගයක් තිබෙනා බව පැවසීම නිසා කැනීම සිදුකළ බව සැකකරුවන් පොලිසියට පවසා තිබුණි.

සැකකරුවන් අතර පහල තුරුවිල ප්‍රදේශයේම පදිංචිකරුවන් දෙදෙනෙකු අනුරාධපුර මල්අතු ඔය පදිංචිකරුවෙකු හා ඇහැලියගොඩ ප්‍රදේශයේ පදිංචිකරුවෙකු සිටිනා බව පොලිසිය කියයි.

යුද හමුදාවේ පොලිස් හේවා බලඇණියේ සේවයේ නියුතු විනයාරක්ෂක පොලිස් සෙබළෙකු නිවාඩු ලබා නිවසට පැමිණිමෙන් පසුව නිදන් සෙවිමේ කටයුත්තට සෙසු පිරිස සමග සහභාගිවි ඇති බව පොලිසිය සිදුකළ පරික්ෂණ වලදි අනාවරණයවි තිබුණි.

අත්අඩංගුවටගත් සැකකරුවන් අතර වයස අවුරුදු 21-47 අතර වියේ පසුවන්නන් සිටින අතර ඔවුන් ඊයේ (07දා) අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.

හිදෝගම පොලිසියේ ස්ථානාධිපති ප්‍රධාන පොලිස් පරික්ෂක ඩි.කොස්තා මහතාගේ උපදෙස්මත පොලිස් සැරයන්වරුන් වන ධර්මසිරි 16876 සම්පත් 33926 හා පොලිස් රියදුරු දිසානායක 12122 යන නිලධාරින් සැකකරුවන් අත්අඩංගුවට ගෙන තිබුණි.

අනුරාධපුර – මහේෂ් විජේසුරිය

Related posts