කදුරුවෙල නගරයේ ව්‍යාපාරික ස්ථාන යළි විවෘත වෙයි

පොලොන්නරුව කදුරුවෙල නගරයේ ව්‍යාපාරික ස්ථාන කිහිපයකින් ඉකුත් සතියේ කොරෝනා ආසාධිතයින් 10 දෙනෙකු හඳුනා ගැනීමත් සමග කදුරුවෙල නගරයේ ව්‍යාපාරික ස්ථාන ආශ්‍රිතව සිදු කළ ජෛව සාම්පල් පරික්ෂාවන් 375 ම සෘණාත්මක තත්ත්වයේ තිබීම නිසා වසා දැමූ වෙළදසැල් විවෘත කිරීමට අවසර දුන් බව පොලොන්නරුව දිස්ත්‍රික් ප්‍රාදේශීය සෞඛ්‍යසේවා අධ්‍යක්ෂ වෛද්‍ය ඩබ්.කේ.එස්.කේ.කුමාරවංශ මහතා පවසයි.

ඒ මහතා මේ බව පැවසුවේ පොලොන්නරුව දිස්ත්‍රික්කයේ කොරෝනා වසංගත තත්ත්වයේ ව්‍යාප්තිය පිළිබඳව අප කළ විමසුමකට පිළිතුරු දෙමිණි.

එහි දී වැඩි දුරටත් අදහස් දැක්වූ ඒ මහතා පැවසුවේ හිගුරක්ගොඩ ගුවන් හමුදා කඳවුරේ නිරෝධායනය වෙමින් සිටි ගුවන් හමුදා නිලධාරින් 71 දෙනෙකුගෙන් 39 දෙනෙකු කොරෝඅනා ආසාධිතයින් බවට තහවුරු වීමත් සමග ඔවුන් ප්‍රතිකාර මධ්‍යස්ථාන කරා යොමු කිරීමට පියවර ගත් බවයි.

“කදුරුවෙළ නගරයේ වෙළදසැල්කිහිපයකින් පසුගිය සතියේ කොවිඩ් වෛරසය ආසාධිතයින් 4ක්  මුළින් හඳුනාගත්තා අහඹු පී.සී.ආර්.පරික්ෂණවලින්.ඊට පස්සේ අපි ඒ ආශ්‍රිත ව වෙළදසැල් කිහිපයකම ජෛව සාම්පල් ලබාගෙන පරික්ෂණවලට යැව්වා.

ඒ අනුව කදුරුවෙල නගරයේ වෙළදසැල්වලින් 10 කු කොවිඩ් ආසාධිතයින් බවට හඳුනා ගත්තා.මේ නිසා අපි නගරයේ පී.සී.ආර්.පරික්ෂණ 375ක් පමණ සිදු කළා.ඒ සියල්ල නෙගටිව් කියලා වාර්තා වුණා.

ඒ නිසා අපි වෙළදසැල් විවෘත කරන්න උපදෙස් දුන්නා.නමුත් හිගුරක්ගොඩ ගුවන් හමුදා කඳවුරේ නිරෝධායනය වෙමින් සිටි ගුවන් හමුදා නිලධාරින් 7කින් 39ක් පොසිටිව් වූ බව දැන ගන්න ලැබුණා.

මේ පිළිබඳව නිවැරදි සංඛ්‍යා ලේඛන වසංගත රෝග විද්‍යායතනයට කෙලින් ම යොමු කරන නිසා නිස්චිතව  අපට වාර්තා වෙන්නේ නෑ .” හෙතෙම වැඩි දුරටත් කීය.

ඊෂා  මුදියන්සේ – පොලොන්නරුව

Related posts