එංගලන්ත ලෙජන්ඩ්ස් කණ්ඩායම සමග පැවති තරගයෙන් ශ්‍රී ලංකා ලෙජන්ඩ්ස් කණ්ඩායමට කඩුලු 6ක විශිෂ්ට ජයක් හිමි කර ගැනීමට සමත් විය.
තරගයේ ප්‍රථමයෙන් පන්දුවට පහර දුන් එංගලන්ත ලෙජන්ඩ්ස් කණ්ඩායම නියමිත පන්දුවාර 20 අවසානයේදි කඩුලු 9ක් දැවී ලබාගත හැකි වූයේ ලකුණු 78ක් පමණි.
විශිෂ්ට පන්දු යැවීමක නිරත වූ ශ්‍රී ලංකා ලෙජන්ඩ්ස් කණ්ඩායමේ නායක ටී.එම්.ඩිල්ෂාන් ලකුණු 6කට කඩුලු 4ක් දවා ගත්තේය.ඔහුගේ පන්දුවාර හතර තුළ එක් නිලකුණු පන්දුවාරයකුත් සටහන් වීම විශේෂත්වයකි.
පිළිතුරු ඉනිම ක්‍රීඩා කළ ශ්‍රී ලංකා ලෙජන්ඩ්ස් කණ්ඩායම පන්දුවාර 7යි පන්දු 3ක් අවසානයේ දී කඩුලු 4ක් පමණක් දැවී තිබියදී තරගයේ ජයග්‍රාහී සීමාව පසු කිරීම සමස්ත විය.විශිෂ්ට ඉනිමක් ක්‍රීඩා කළ ඩිල්ෂාන් පන්දු 26 කදී ලකුණු 61ක් ලබා ගැනීමට සමත් විය.
ශ්‍රී ලංකාව, ප්‍රසාද ලකුණු සටහනේ සිව්වැනි ස්ථානය හිමි කර ගන්නා කණ්ඩායම සමගින් අවසන් පූර්ව වටයේ දී තරග වැදීමට නියමිතයි.
රෝඩ් සේෆ්ටි වර්ල්ඩ් සීරීස් තරගාවලියේ දකුණු අප්‍රිකානු ලෙජන්ඩ්ස් පිල සමඟ පැවැති තරගයෙන් ලකුණු 56ක ජයක් හිමි කර ගැනීමට ඉන්දීය ලෙජන්ඩ්ස් ක්‍රීඩකයෝ සමත් වීමත් සමඟින් ප්‍රසාද ලකුණු සටහනේ පෙරමුණ ගනිමින් අවසන් පූර්ව වටයේ දෙවන ස්ථානය වෙන් කර ගත්තේය.
