මහජනයා මුලාකල හොර උප පොලිස් පරීක්ෂකවරයෙක්

horapolice

ෆේස්බුක් හා අන්තර්ජාලයේ විවිධ පිටු හරහා උප පොලිස් පරීක්ෂකවරයෙක් හැටියට ව්‍යාජ ලෙස පෙනී සිටිමින් මහජනයා මුලාකරමින් විවිධ වංචා සහගත ක්‍රියාවන්හි නිරත වීමට උත්සහ කළ පුද්ගලයෙකු පන්නිපිටිය, පොල්වත්ත ප්‍රදේශයෙන් අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය පවසයි.

අපරාධකරුවන් හා වරෙන්තුකරුවන් අත්අඩංගුවට ගැනීමේ විශේෂ මෙහෙයුමක් අතරතුර පුද්ගලයෙකුගෙන් ලැබුණු තොරතුරක් මත මෙම පුද්ගලයා අත්අඩංගුවට ගත් බවත් පොලීසිය පැවසීය.

වට්ස් ඇප්, ඉමෝ හා වයිබර් මෙන්ම මුහුණු පොත හරහා ඡායාරූප මුදාහරිමින් තමන් ශ්‍රී ලංකා පොලිසියේ උප පොලිස් පරීක්ෂකවරයෙකු හැටියට සේවය කරන බව මෙම පුද්ගලයා කිහිපවතාවක්ම මිතුරන්ට හා සමාජයේ විවිධ පුද්ගලයන්ට දැනුම් දී ඇති බවත් මූලික පරීක්ෂණයේදී අනාවරණය වූ බවද පොලීසිය පැවසීය.

සැකකරු (35) වන වියේ පසුවන බටලන්ද, පාර රක්වාන ප්‍රදේශයේ ස්ථිර වශයෙන් පදිංචිකරුවකු වන බවත් දැනට මාස අටකට පමණ ඉහතදී පන්නිපිටිය, පොල්වත්ත ප්‍රදේශයෙන් මාසික කුලී පදනම මත මෙම නිවස කුලියට ගෙන ඇති බවත් නිවස කුලියට ගැනීමේදී නිවෙසේ අයිතිකරුවන්ටද පවසා ඇත්තේ තමන් පොලීසියේ උසස් නිලධාරියෙක් ලෙස රැකියාව කරන බවය.

විවාහක අයෙක් වන මෙම පුද්ගලයා රැකියාව වශයෙන් ගොඩනැගිලි ඉදිකිරීම් ක්ෂේත්‍රයේ පුද්ගලික ආයතනයක රියදුරකු වශයෙන් රැකියාව සිදු කරන බවත් අනාවරණය වූ බවද පොලීසිය පැවසීය.

අත්අඩංගුවට පත් වූ සැකකරු සන්තකයේ තිබී සොයා ගත් පොලිස් නිල ඇඳුමක් හා ව්‍යාජ ආකාරයෙන් පොලිස් නිලධාරියෙක් ලෙස පෙනී සිටීමට උත්සාහ කිරීම සම්බන්ධයෙන් අධිකරණයේ නඩු පැවරීමට කටයුතු කරන බවත් මෙම පුද්ගලයා ශ්‍රී ලංකා පොලීසියේ හා උප පොලිස් පරීක්ෂකවරයෙකු යයි පවසමින් යම් අපරාධයක් හෝ රැවටීමක් සිදුකර ඇත්නම් ඒ පිළිබඳ සෙවීම සඳහා විශේෂ පරීක්ෂණයක් පවත්වන බවත් පොලීසිය පැවසීය.

සැකකරු  නුගේගොඩ මහේස්ත්‍රාත් අධිකරණයට ඉදිරිපත් කිරීමෙන් අනතුරුව සැකකරු වරද පිළිගත් බැවින් රුපියල් ලක්ෂ දෙකක ශරීර ඇපයක් මත මුදාහරින ලෙස මහේස්ත්‍රාත් ප්‍රසන්න අල්විස් මහතා නියෝග ලබාදී තිබිණි.

සිද්ධිය සම්බන්ධයෙන් වැඩිදුර පරීක්ෂණ බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් බස්නාහිර පළාත දකුණ භාර නියෝජ්‍ය පොලිස්පති කපිල කඩුපිටිය බස්නාහිර දකුණ අපරාධ කොට්ඨාශයේ අධ්‍යක්ෂක ජේෂ්ඨ පොලිස් අධිකාරි ලලිත් අබේසේකර පොලිස් අධිකාරී 01රොහාන් පෙරේරා යන මහත්වරුන්ගේ සෘජු අධීක්ෂණය මත බස්නාහිර දකුණ අපරාධ කොට්ඨාසයේ වැඩබලන ස්ථානාධිපති ප්‍රධාන පොලිස් පරීක්ෂක එම්.ඒ.එල්.එස් මුණසිංහ මහතාගේ උපදෙස් මත පොලිස් පරීක්ෂක හේමන්ත කුමාර මහතාගේ මෙහෙයවීමෙන් පොලිස් සැරයන් 59951 සුනිල්, 21284 බණ්ඩාර, පොලිස් කොස්තාපල් 84762 කුමාර යන නිලධාරීන් විසින් පරීක්ෂණ පවත්වනු ලබයි.

සමීර අබේසිංහ – නුගේගොඩ සමුහ


sri lanka breaking news, srilanka breaking news, breaking news sinhala, sinhala breaking news, sri lanka news, newspapers in sri lanka, newspapers sri lanka, sri lanka newspapers, lk

Related posts