දීප්ති කුමාර ගුණරත්න මොනවා උනත් මරු සටනක් දෙනවා. ඒක නිකං කම් ඕ ගෝ චිකාගෝ වගේ සටනක්. මෝර්ටල් කම්බැට් වගේ මතවාදීය නෙලිල්ලක්. දශක ගණනාවක් වතුර යට ඔබාගෙන හිටිය බැලුමක් වේගයෙන් උඩට එනවා වගේ දීප්ති උඩට එනවා.
ඉරාජ් සමග දීප්ති කළ සංවාදය දීප්තිට අතිශය අපහසු වුණා. නමුත් ඔහු ඒ අභියෝගයට දත්මිටි කාගෙන මුහුණ දුන්නා. ඒක ඔහු විසින් ඔහුවම ටෙස්ට් කරගත්තා වගේ එකක්. අඩුපාඩු තිබුණට දීප්ති ඒක දින්නා. ඉරාජ් සහ දීප්ති දෙන්නම දින්නා.
ඉරාජ් නොදන්නවා උනාට ඉරාජ්ව හදන්න දීප්ති ඓතිහාසික කාර්යභාරයක් කරලා තියෙනවා. 90 දශකයේ පාසල් ගිය මගේ පරම්පරාව තමයි දීප්තිලා ඒ කාලේ කතා කළ පොප් කල්චර් එකට කුළුඳුලේ එක්ස්පෝස් වුණේ. රෝයල් ගිය ඉරාජ් නොදන්නවා වුණාට සබර්බන් තාරුණ්යට දීප්තිලාගේ අදහස් බාගෙට හරි අහුවුණා. ඉරාජ් මියුසික් වීඩියෝ හදලා දෙනකොට ඒවා ගන්න ඕඩියන්ස් එක හදලා තිබුණේ දීප්ති. ඒ අනුව ඉරාජ් ඇත්තටම දීප්තිට ණයගැතියි.
දීප්ති සෑහෙන කාලයක් තිස්සේ දේශපාලනය එයාට පුළුවන් විදිහට කියවලා තිබෙනවා. දැන් එයාට දේශපාලනය අභිමුඛ වෙලා තියෙනවා. එයා කිසියම් අධිෂ්ඨානයකින් සහ තරමක නොඉවසිල්ලකින් ගහගෙන ගහගෙන යනවා. දීප්ති අනිවාර්යෙන්ම ඊළඟ පාර්ලිමේන්තුවේ සිටිය යුතුයි කියා මා හිතනවා. අඩුම ගානේ ජවිපෙ ගහන ගේම්වලට තාර්කිකව වගේම ජවිපෙ භාෂාවෙන්ම උත්තර දෙන්න පුළුවන් මිනිහෙකුට ඉන්නේ දීප්ති විතරයි. අනෙක දීප්ති හෙන ගොසිපි. හැම එකාගෙම ජීවිතවල කුණු රහස් දන්නවා. දේශපාලනයෙදී ඒක වැදගත් බාර්ගෙයිනින් මෙවලමක්. එතකොට අපිට ඒවා බලලා විශාල ආතල් එකක් ගන්න පුළුවන්. වෙන මොනවා නැති වුණත් දීප්ති පාර්ලිමේන්තුවේ ඉන්නකොට නිර්මාල් දේවසිරි හැසිරෙන විදිහ ඔක්කෝටම වැඩිය ආතල් වෙනවා.
ප්රශ්නය තියෙන්නේ ඔහුට මිනිස්සු ඡන්දෙ දෙයිද කියන එකයි. තව මහන්සි වුණොත් බැරි වෙන එකක් නැහැ. විකාර නැතුව මෙන්ස්ට්රීම් පොලිටික්ස් කළොත් පුළුවන්. කාගෙහරි හිත රිදුනා නම් සමාවෙන්න. ධර්මය අපට මග වේවා!
එරන්ද ගිනිගේ
