දිඹුලාගල අධ්යාපන කලාපයේ පාසලක විදුහල්පතිවරයෙකු නව කොරෝනා වෛරසය ආසාධිත බව සිදු කරන ලද පී.සී ආර්.පරික්ෂණයකින් තහවුරු වීමත් සමග එම ආරංචිය සැලවූ දෙමව්පියන් සිය දරුවන් රැගෙන යාමට පාසල අසලට රොක් වූ අවස්ථාවේ සෞඛ්ය අංශ සමග උනුසුම් වචන හුවමාරුවක් සිදු වී තිබේ.
මෙම සිද්ධිය සිදුව ඇත්තේ මනම්පිටිය සිංහල මහා විද්යාලයේ ගේට්ටුව අසලදීය.මනම්පිටිය සිංහල මහා විද්යාලයේ විදුහල්පති බරණ විජේරත්න මහතා ඉකුත්දා ස්වේච්ඡාවෙන් ඉදිරිපත්වී පී.සී.ආර්.පරික්ෂණයකට පෙනී සිට ඇත.
එහි ප්රතිපලය ධනාත්මක වීම හේතුවෙන් එම ආරංචිය මනම්පිටිය සිංහල මහා විද්යාලයේ දෙමව්පියන් ට සැල වීමෙන් දෙමව්පියන් පාසල අසලට රැස්ව සිය ළමයින් රැගෙන යාමට ඉල්ලා ඇත.
එම අවස්ථාවේ පැමිණි සෞඛ්ය අංශ ළමයින් හා ගුරුවරුන් පිළිබඳව තොරතුරු ලබා ගැනීමට කටයුතු කර ඇති අතර එහි දී මෙම උණුසුම්කාරි තත්ත්වය ඇතිව තිබේ.පසුව සෞඛ්ය අංශ පාසලේ ගුරුවරුන් හා සිසුන්ගේ විස්තර ලබාගෙන සිසුන් වෙත සෞඛ්ය මාර්ගෝපදේශ පිළිබඳව වැඩසටහනක් ද ක්රියාත්මක කර ඇත.
ඇතිව තිබෙන තත්ත්වය අනුව මනම්පිටිය සිංහල මහා විද්යාලය වසා දමන්නේ දැයි දිඹුලාගල කලාප අධ්යාපන අධ්යක්ෂිකා චන්දිමාලා වාසලමුදලි මහත්මියගෙන් කළ විමසුමක දී සිසුන් 182ක් හා ගුරුවරුන් 21ක් පාසල් පැමිණ සිටි බවත් සෞඛ්ය අංශවල උපදෙස් මත ඉදිරි ක්රියාමාර්ග ගන්නා බවත් පැවසුවා ය.
මේ පිළිබඳව පොලොන්නරුව ප්රාදේශීය සෞඛ්ය සේවා අධ්යක්ෂ කාර්යාලයේ වසංගත රෝග අංශයේ වසංගත රෝග විද්යාඥ වෛද්ය ප්රියන්ත බණ්ඩාර මහතාගෙන් කළ විමසුමක දී හෙතෙම සඳහන් කළේ මනම්පිටිය සිංහල මහා විද්යාලයේ විදුහල්පතිවරයා කොරෝනා පොසිටිව් වීම නිසා ඔහු ගේ පවුලේ සියලු දෙනා පී.සී.ආර්.පරික්ෂණ සිදු කළ බවත් ආශ්රිතයන් පිරිසක් නිවෙස් තුළ නිරෝධායනයට ලක් කර තවත් ආශ්රිතයන් සෙවීමේ කටයුතු සිදු කරමින් සිටින බවත් ය.
මනම්පිටිය සිංහල මහා විද්යාලයේ සිසුන් හා ගුරුවරුන්ගේ තොරතුරු ලබා ගැනීමට කටයුතු කළ බවත් දැනට පාසල වැසීමට තීරණය කර නොමැති බවද හෙතෙම පැවසීය.
මනම්පිටිය සිංහල මහා විද්යාලයේ විදුහල්පතිවරයා වැලිකන්ද රෝහලට ඇතුළත් කර ඇත.
ඊෂා මුදියන්සේ – පොලොන්නරුව
