මහා පරිමාණ මත්ද්රව්ය ජාවාරම්කරුවෙක් සහ පාතාල නායකයෙක් වන එල්ලාවල ලියනගේ ධර්මසිරි පෙරේරා නොහොත් රත්මලාන ඇල්ටෝ ධර්මේ නැමැත්තා අබුඩාබි පොලීසිය අත්අඩංගුවට ගෙන ඇතැයි පොලිස් මාධ්ය ප්රකාශක නියෝජ්ය පොලිස්පති අජිත් රෝහන මහතා පවසයි .
2018 මැයි මස 18 වැනිදා ක්රිකට් ක්රීඩක ධනංජය සිල්වා මහතාගේ පියා වූ රංජන් ද සිල්වා මහතා ඝාතනය කිරිමෙන් අනතුරුව සැකකාර ධර්මසිරි පෙරේරා නැමැත්තා එක්සත් අරාබි එමිර් රාජ්යයට පලාගොස් සැඟවී සිටියදී මෙලෙස අත්අඩංගුවට ගෙන ඇති බව ද මාධ්ය ප්රකාශකවරයා පැවසීය.
ඉකුත් මැයි 31 වෙනිදා මොරටුව, සොයිසා පුර හෝටලයකට වෙඩි තැබීමේ සිද්ධිය සම්බන්ධයෙන් අත්අඩංගුවට ගත් සැකකරුවන් තිදෙනාගෙන් හෙළි වූ තොරතුරු අනුව ගල්කිස්ස ජේෂ්ඨ පොලිස් අධිකාරි රොහාන් ප්රේමරත්න මහතා මොරටුව මහේස්ත්රාත් අධිකරණය වෙත කරුණු දැන්වීමෙන් පසුව අධිකරණය හරහා ජාත්යන්තර පොලීසිය (ඉන්ටර්පෝල්) වෙත වරෙන්තුවක් ලබාගැනීමට කටයුතු සිදුකිරීමෙන් අනතුරුව අබූඩාබි පොලිසිය මෙම මහා පරිමාණ මත්ද්රව්ය ජාවාරම්කරු අත්අඩංගුවට ගත් බව නියෝජ්ය පොලිස්පතිවරයා පැවසීය.
ගල්කිස්ස ජ්යෙෂ්ඨ පොලිස් අධිකාරිවරයා මොරටුව අධිකරණය මගින් ලබාගත් වරෙන්තුව අන්තර්ජාතික පොලිසිය වෙත ඉදිරිපත් කර රතු නිවේදනයක් ඉල්ලා ඇති බවත් ඒ අනුව රතු නිවේදනය ලැබුණු බවත් එක්සත් අරාබි එමිර් රාජ්යයේ ඉන්ටපෝල් ශාඛා වෙත එම රතු නිවේදනය සම්බන්ධයෙන් දැනුම් දීමෙන් අනතුරුව අබුඩාබි පොලිසියේ මගින් සැකකරු අත්අඩංගුවට ගෙන තිබූ බව නියෝජ්ය පොලිස්පතිවරයා පවසයි.
මෙම සැකකරු රංජන් ද සිල්වා මහතා ඝාතනයෙන් අනතුරුව මේ දක්වා ඔහුගේ උපදෙස් මත විවිධ පුද්ගලයන් වෙඩි තබා ඝාතනය කිරීම තියුණු ආයුධවලින් කපා බරපතළ තුවාල සිදු කිරීම ,අත් බෝම්බ වලින් පහර දීම, පැහැර ගෙන ගොස් ඝාතනය කිරීම ආදි අපරාධයන් එකොළහක් සිදුකර තිබූ බව නියෝජ්ය පොලිස්පතිවරයා පැවසීය.
පසුගිය මැයි මස 19 දින මොරටුව සොයිසාපුර හෝටලයකට වෙඩිතබා ,තියුණු ආයුධවලින් පහර දී පුද්ගලයකු තුවාල සිදු කිරීම ඇතුළු දේපළවලට අලාභානි කිරීම ඔහුගේ උපදෙස් මත සිදු කර ඇති බවත් අපරාධයක්ම සැකකරු එරට සිට වට්ස්ඇප් හා අන්තර්ජාල තාක්ෂණය ඔස්සේ නරඹා ඇති බවත් විමර්ශනවලදී හෙළිවී ඇත .
මොරටුව සොයිසා පුර හෝටලයට වෙඩි තැබීමට පෙර සැකකරු වට්ස්ඇප් තාක්ෂණය ඔස්සේ ගල්කිස්ස ජේෂ්ඨ පොලිස් අධිකාරිට කියපන් ගල්කිස්ස ඕඅයිසී එක්ක ගිහිල්ලා උණ්ඩ අහුලන්න කියලා යැයි පවසමින් හෝටල් හිමිකරුට වට්ස්ඇප් තාක්ෂණ ඔස්සේ පණිවිඩයක් එවා තිබූ බව උසස් පොලිස් නිලධාරියෙක් පැවසීය.
එම සැකකරු මෙරටට ගෙන්වා ගැනීම සඳහා අවශ්ය කටයුතු සිදු කරමින් පවතිනවා
සමීර අබේසිංහ – බොරලැස්ගමුව
