ස්නායූ වේදනා සමනය සදහා වෛද්ය නිර්දේශමත පමණක් ලබාදෙන ඖෂධ පෙති (මත්පෙති) 2050ක් තෑගී පාර්සලයක් ලෙස ප්රවාහනය කළ පෞද්ගලික මගී බස් රථයක රියදුරා හා කොන්දොස්තරවරයා නොච්චියාගම පොලිසියේ ස්ථානාධිපතිවරයා ඇතුළු නිලධාරින් කණ්ඩායමක් විසින් පෙරේදා (11දා) සවස අත්අඩංගුවට ගෙන තිබේ.
මත්ද්රව්ය තොගයක් කොළඹ සිට බස් රථයකින් ප්රවාහනය කරනා බවට නොච්චියාගම පොලිසියේ ස්ථානාධිපති ප්රධාන පොලිස් පරික්ෂක එම්.එස් කුමාරසේන මහතාට ලැබුණු තොරතුරකට අනුව පුත්තලම අනුරාධපුර ප්රධාන මාර්ගයේ නොච්චියාගම පොලිසිය ඉදිරිපිට මාර්ග බාධකයක් යොදා සිදුකළ පරික්ෂාවකදි තෑගි පාර්සලයක් ලෙස අසුරා බස් රථයේ රාක්කයක රදවා තිබූ මත්පෙති සහිත පාර්සලය පොලිසියට හමුවි තිබේ.
තොරතුරු වලට අනුව බස් රථ තුනක් පරික්ෂා කිරිමෙන් පසුව කොළඹ සිට වව්නියාවට ධාවනයවූ බස් රථයේ තිබී වර්ග දෙකකින් යුතු මත්පෙති තොගය පොලිස් අත්අඩංගුවට පත්වි තිබු අතර මිලිග්රෑම් 150 බැගින්වු වර්ග දෙකක මත්පෙති පෙති 2050 ක් පාර්සලයේ තිබූ බව පොලිසිය පවසයි.
තෑගී පාර්සලයක් ආකාරයට ඇසුරුම්කර තිබූ මත්පෙති සහිත පෙට්ටිය පොලිස් භාරයට ගෙන බස් රථ සේවකයන්ගෙන් සිදුකළ ප්රශ්න කිරීම් වලදි සීදූව ප්රදේශයේ පදිංචි පුද්ගලයෙකු විසින් සාලියපුර පදිංචිකරුවෙකුට ලබාදෙන ලෙස දන්වා බස් රථයට පෙට්ටිය ලබාදුන් බව පවසා තිබුණි.
සැකකරුවන් දෙදෙනාත් මත්පෙති ජාවාරමට සම්බන්ධ බව පොලිසිය පවසන අතර මත්පෙති තොගය ජාවාරම්කරුවෙකුට ලබාදීමට ඔවුන් ප්රවාහනය කර තිබෙනා බව පවසයි.
විශාල ප්රමාණයේ පෙති 1050ක් හා කුඩා ප්රමාණයේ පෙති 1000ක් එහි තිබි ඇති අතර එක් මත්පෙත්තක් රුපියල් 150ක පමණ මුදලකට ජාවාරම්කරුවන් අලවිකරනා බවත් එම පෙති තොගය රුපියල් තුන් ලක්ෂයකට අධික මුදලකට විකුණනා බව පොලිසිය තහවුරු කරගෙන තිබිණි.
ස්නායූ වේදනා සදහා වෛද්ය නිර්දේශයන් මත පමණක් ඖෂධ ලබාදෙන බව පවසන පොලිසිය මතට ඇබ්බැහිවූවන් කිසිදු වෛද්ය නිර්දේශයක් නොමැතිව ඒවා පානය කරනා බව පවසයි.
අත්අඩංගුවටගත් වහමල්ගොල්ලෑව හා නොරෙච්චෝලය යන ප්රදේශවල පදිංචි සැකකරුවන් දෙදෙනා ඊයේ (12දා) තඹුත්තේගම මහේස්ත්රාත් අධිකරණයට ඉදිරිපත් කිරීමට නියමිතව තිබුණි.
නොච්චියාගම පොලිසියේ ස්ථානාධිපති ප්රධාන පොලිස් පරික්ෂක එම්.එස් කුමාරසේන මහතා ඇතුළු නිලධාරින් කණ්ඩායමක් සැකකරුවන් සමග මත්පෙති තොගය අත්අඩංගුවට ගෙන තිබුණි.
අනුරාධපුර – මහේෂ් විජේසූරිය
