අපි ජීවත් වෙන්නෙ ජනාධිපති තුමාගෙ ගමේ. හිටිපු ජනාධිපති තුමාගේ ගමේ. අගමැති තුමාගෙ ගමේ . වත්මන් වාරිමාර්ග ඇමති තුමාගෙ ගමේ. නමුත් අපිට බොන්න වතුර ටිකක් නෑ.
බොන්න පිරිසිදු වතුර ටිකක් නැතිව අපි පරම්පරා ගණනක් දුක් විදිනවා.පරම්පරා ගණනක් බිව්වෙ මඩ වතුර . කිවුල් වතුර. මේ වතුර බීල ගමේ කිහිප දෙනෙක්ම රෝහල් ගානෙ ගාටනවා යැයි මැදමුලන ග්රාමසේවක වසමේ පල්ලේමුලන පවුල් 30ක් වැසියෝ පවසති.
අපේ ගෙවල් ටික පිහිටල තියෙන්නේ වීරකැටිය කපුගම්පොත මාර්ගයට යාබදව. අපිට බොන්න වතුර ටිකක් දෙන්න කියල අපි පරම්රාප ගණනක් තිසේසේ දේශපාලකයින්ට කිවුවා.මේ ගමේ බහුතරය ජනාධිපති තුමාට අගමැති තුමාට දේශපාලනය කරපු අය. තවමත් ඡන්දය ඉල්ලගෙන අපේ ගෙවල් වලට දේශපාලකයින් එනවා. නමුත් අපි තවමත් බොන්නේ මඩ වතුර. කිවුල් වතුර.
අපේ ගමටම තියෙන්නේ එකම ළිදයි. ඒ ළිදෙන් තමයි ගමටම වතුර දෙන්නේ. දැන් මේ ලිද කපල අවුරුදු දහයක් විතර වෙනවා.ඊට කලින් අපි ‘ගලේඅමුණෙ’ ඔයේ වලවල් කපල වතුර එකතු කරගෙන ගෙනල්ල බිව්වා ළිදේ වතුරු බොන්න බෑ කිවුල් රස එනවා. වතුර උණු කරන කේතලයේ මඩ තට්ටුවක් බැදිලා.
ගමට ම වතුර දෙන ළිද නියං කාලෙට හිදෙනවා.ඊට පස්සෙ වතුර හොයා ගෙන අපි තැන් තැන් වලට යනවා.පානීය ජල හිගයෙන් මුළු ජීවිත කාලයම දුක්විදින ගැමියෝ පවසති.
අපේ ගම සීමාවටම නල වතුර ඇවිල්ල තියෙනවා. නමුත් අපේ ගමට වතුර දෙන්නේ නෑ. වතුර ඉල්ලුවාම කියනවා. එළන ලද වතුර බට වලින් අළුතෙන් වතුර දෙන්න පුළුවන් කමක් නෑ කියල .
නමුත් ඒ ප්රශ්නෙට උත්තර හොයන්න වගකිව යුතු අය කිසිවෙක් උත්සාහ ගන්නේ නෑ. අපි නොසලකා හරින ලද පිරිසක් බවට අද පත් වෙලා තිබෙනවා.
නමුත් ඡන්දෙ දවසට ඡන්දය දාන්න ඡන්ද පොළට යන්න දේශපාලකයො වාහන එවනවා.එහෙම ගිහිල්ල ඇවැදින් මේ ගමේ බොහෝ ජනතාව මඩ වතුර බොමින් පීඩා විදින බව ගම් වැසියෙකු වූ බුද්ධිකා සදමාලි පවසන්නීය.
මේ දිනවල රටපුරා මහමැතිවරණ පොරය දියත් වෙමින් තිබේ.මැදමුලන පුරා උග්ර මනාප පොරයක් තිබේ.බොන්නට වතුර නැතිව පීඩා විදන ජනතාවගේ නිවස වල පිරී පවතින්නේ ඡන්ද පොරොන්දු වලින් ගහන මැතිවරණ ප්රකාශනයන්ය .
එහෙත් පරම්පරා ගණනක් තිස්සේ මැදමුලනේ පවුල් රැසක් මේ වන විටත් පානීය ජල හිගයෙන් පීඩා විදිමින් සිටිති.
හම්බන්තොට සංවර්ධනය කොට ඇති බවට වහසි බස් දොඩන දේශපාලකයින්ට මෙම ජනතාවගේ හඩ නොඇසීම කණගාටුවට කරණක් නොවන්නේද?
චන්ද්රසේන ගමගේ
