කොරෝනා කොවීඩ් වසංගත තත්ත්වයත් සමඟ අඩපණ වී ඇති මධ්යම පළාතේ දේශීය කර්මාන්ත කඩිනමින් නඟා සිටුවීම සදහා වැඩපිළිවෙලක් දියත් කරන බව මධ්යම පළාත් ආණ්ඩුකාර ලලිත් යූ. ගමගේ මහතා පවසයි.
මෙවර අය වැය මගින් දේශීය නිෂ්පාදන දිරි ගැන්වීමේ දීර්ඝ කාලීන වැඩපිළිවෙලක් ක්රියාත්මක වන බව මධ්යම පළාත් ස්වයං රැකියා හා දේශීය කර්මාන්ත දියුණු කිරීම සඳහා ව්යවසායකයන් වෙත උපකරණ ප්රදානය කිරීම නිමිත්තෙන් මධ්යම පළාත් කර්මාන්ත අමාත්යංශයේදී පැවැති උත්සවයකදී ඒ මහතා සදහන් කළේය.
මධ්යම පළාත් කර්මාන්ත අමාත්යංශය හා එම දෙපාර්තමේන්තුවේ රුපියල් මිලියන තුනක වියදමින් ස්වයං රැකියා හා සුළු පරිමාණ කර්මාන්තකරුවන් එකසිය තිස් දෙනෙකු සඳහා මෙම ද්රව්යාධාර තොගය ප්රදානය කෙරිණි.
ඒ නිමිත්තෙන් පැවැති උත්සවයේදී ප්රතිලාභීන් අමතමින්, ග්රාමීය ආර්ථිකය නගා සිටුවීමට වත්මන් ආණ්ඩුව විශේෂ වැඩපිළිවෙලක් දියත් කරන බව කීවේය. කුඩා කර්මාන්තකරුවන්ගේ වෙළඳ පොල මෙන්ම ඔවුන්ගේ ආර්ථිකය ශක්තිමත් කර නොසැලෙන ව්යවසායක පිරිසක් බිහිකිරීම වත්මන් ආණ්ඩුවේ අපේක්ෂාව යැයි ආණ්ඩුකාරවරයා සදහන් කළේය.
කොරෝනා වසංගතය ආරම්භයේදීම කර්මාන්තකරුවන් රැසක් දැඩි අසරණ තත්ත්වයට පත් වූ නිසා කොරෝනා දෙවන රැල්ලේදී රට නොවසා කර්මාන්තකරුවන් ආරක්ෂා කිරීමට ආණ්ඩුව ක්රියාකරන බව ඒ මහතා කීවේය. නිෂ්පාදන සඳහා සරිලන දේශීය හා විදේශීය මිලක් නියම කිරීම සඳහා කටයුතු කරන බව ද ඒ් මහතා කීවේය.
1970 පමණ වැනි යුගවලදී බතික් වැනි දේශීය නිෂ්පාදන ශත්තිමත්ව පැවැතියත් පසුව බලයට පත් වූ පාලකයන් ගත් විවිධ තීරණ නිසා එම කර්මාන්ත බිද වැටීමට ලක් වුණු බව ආණ්ඩුකාරවරයා අවධාරණය කළේය.
එම කර්මාන්ත ආරක්ෂා කර ගැනීම සඳහා ඉන්දුනීසියාව වැනි රටවල් සතියකට එක් දිනයක් දේශීය නිෂ්පාදන සදහා ඇදුම් පැළදීම රාජ්ය සේවකයන් සඳහා අනිවාර්යය කර ඇති බවත් මේ තුළින් සිය දේශීය කර්මාන්ත මේ දක්වා ම රැක ගැනීමට ඉන්දුනීසියාවට හැකිවුණු බව ඒ මහතා සදහන් කළේය.
ශ්රී ලංකාවේද දේශීය කර්මාන්ත රැක ගැනීම සඳහා අතිගරු ජනාධිපතිවරයා ගෙන ඇති තීරණය අනුව යමින් මධ්යම පළාතේ කර්මාන්ත හා ව්යවසායකයන් රැක ගැනීම සඳහා කටයුතු කරන බව ආණ්ඩුාකර ලලිත් යූ. ගමගේ මහතා ප්රකාශ කළේය.
මධ්යම පළාත් ප්රධාන ලේකම් ගාමීණී රාජරත්න මහතා, මධ්යම පළාත් කර්මාන්ත අමාත්යංශයේ ලේකම් මධුපානී පියසේන මහත්මිය, පළාත් කර්මාන්ත දෙපාර්තමේන්තුවේ අධ්යක්ෂ සමීර රත්නායක මහතා, හිටපු පළාත් සභා මන්ත්රී එස්.පී.රත්නායක මහතා ඇතුලු පිරිසක් මේ අවස්ථාවට එක්වූහ.
නදීක දයා බණ්ඩාර – මහනුවර
