ප්රෞඪ ඉතිහාසයකට උරුමකම් කියන රට වට බැඳි රන් වැට, ශ්රී ලංකා නාවික හමුදාවේ 69 වන සංවත්සරය වෙනුවෙන් නාවික හමුදාධිපති, වයිස් අද්මිරාල් පියල් ද සිල්වා ගේ උපදේශකත්වය හා මඟපෙන්වීම යටතේ ආගමික, සමාජ සුභසාධන සහ නාවික සම්ප්රදායන්ට මුල්තැනක් ලබා දෙමින් වැඩසටහන් රැසක් සංවිධානය කරන ලදී.
2019 නොවැම්බර් 27 සහ 28 යන දෙදින අනුරාධපුරය ඓතිහාසික ශ්රී මහා බෝධීන් වහන්සේ අභියස පැවති නාවික ධජයන්ට සෙත්පැතීමේ ධජ පූජාව සහ කප්රුක් පූජාව සමගින් ආරම්භ කරන ලද ආගමික වැඩසටහන් මාලාවේ ක්රිස්තියානි දේව මෙහෙය කොළඹ, ශාන්ත ලුසියා දෙව්මැදුරේ ද, මුස්ලිම් ආගමික උත්සවය කොළඹ කොටුව, චැතැම් වීදියේ ජුම්මා මස්ජිඩ් මුස්ලිම් පල්ලියේ ද, හින්දු ආගමික උත්සවය කොළඹ, ශ්රී පොන්නම්බලවානේෂ්වරම් හින්දු කෝවිලේදී ද පැවැත්විණි.
2019 නොවැම්බර් මස 29 වන දින වැලිසර, නාවික හමුදා පරිශ්රයේදී සර්වරාත්රික පරිත්රාන ධර්ම දේශනයක් පැවැති අතර, සර්ව රාත්රික පරිත්රාන ධර්ම දේශනයෙන් අනතුරුව, නොවැම්බර් 30 වන දින ගරුතර මහා සංඝරත්නය විෂයෙහි දානමය පිංකමක් සහ පිරිකර පූජාවක් ද පැවැත්විණි. එහිදී සංඝයාවහන්සේලා විසින් මාතෘ භූමිය වෙනුවෙන් සිය ජීවිතය පූජා කළ නාවික විරුවන්හට සහ ආබාධිත තත්වයට පත් නාවික විරුවන්හට මෙන්ම වත්මන් නාවික හමුදාධිපතිතුමන් ඇතුළු සියලුම නාවික පුද්ගලයන්හට ආශිර්වාද ප්රාර්ථනා කරන ලදී.
ජනීය ශ්රී දළදා සමිඳුන් අභියසදී ගිලන්පස සහිත බුද්ධ පූජාවක් පැවැත්වීමට ද කටයුතු කෙරිණි. නාවික හමුදාධිපතිතුමන් විසින් අස්ගිරි පාර්ශවයේ සහ මල්වතු පාර්ශවයේ මහානායක හිමිවරුන් බැහැදැකීමෙන් අනතුරුව ශ්රී දළදා මාලිගය පරිශ්රයේදී උත්තම ශ්රී දන්ත දාතූන්වහන්සේ උදෙසා පූජාවක් ද ගරුතර මහා සංඝරත්නය විෂයෙහි දානය පිළිගැන්වීම ද සිදු විය. මෙම අවස්ථාවන් සඳහා නාවික හමුදා සේවා වනිතා ඒකකයේ ගරු සභාපතිනි, අරුන්දති උදිතමාලා ජයනෙත්ති මැතිණිය, නාවික හමුදා මාණ්ඩලික ප්රධානී, රියර් අද්මිරාල් නිශාන්ත උළුගේතැන්න, නාවික විධානයන් භාර ආඥාපතිවරුන්, අධ්යක්ෂක ජෙනරාල්වරුන්, ජ්යෙෂ්ඨ නාවික නිලධාරීන්, නාවිකයන් මෙන්ම ඔවුන්ගේ පවුල්වල සාමාජික සාමාජිකාවන් ද එක්වී සිටියහ.
තවද, 69 වන නාවික දිනය වෙනුවෙන් ශ්රී ලංකා නාවික නෞකා පරාක්රම ආයතනයේ අණදෙන නිලධාරි, කපිතාන් මහේෂ් ද සිල්වා ගේ අංශ පිරික්සුමක් පැවැති අතර, එහිදී අණදෙන නිලධාරිතුමා විසින් නැව් මුළුව ඇමතීමට ද කටයුතු කරන ලදි. අනතරුව, නාවික හමුදා අධ්යක්ෂ ජෙනරාල් මෙහෙයුම්, රියර් අද්මිරාල් නන්දන ජයරත්න ගේ ප්රදානත්වයෙන් නිලධාරීන් සහ නාවිකයන්ගේ සහභාගීත්වයෙන් මංගල භෝජන සංග්රහයක් පැවැත්වීමට කටයුතු කරන කරන ලද අතර, ඒ සඳහා නාවික හමුදා මූලස්ථානයට සහ ශ්රී ලංකා නාවික නෞකා පරාක්රම ආයතනයට අනුයුක්ත ජ්යේෂ්ඨ නිලධාරීන් මෙන්ම නාවික පුද්ගලයින් විශාල පිරිසක් ද එක්වී සිටියහ.
මිට සමගාමීව සියළුම නාවික විධානයන්හි සර්ව ආගමික කටයුතු, ප්රජා සත්කාරක සහ සමාජ සුභසාධන වැඩසටහන් රැසක් ද සංවිධානය කර තිබුණි.
