“මිනිස්සුන්ට කන්න පොල් නැතත් ව්යාපාරිකයෝ බලාගෙන ඉන්නෙ මේ අවුරුද්දෙත් පොල් අපනයනය කරල විශාල ලාභයක් හොයන්න. ආණ්ඩුව වහාම මේ ප්රශ්නයට මැදිහත් වෙන්න ඕන.” යැයි ජන අරගල සන්ධානයේ ජාතික විධායක සභික පුබුදු ජයගොඩ පැවසීය.
පොල් මිල ඉහළ යාම සහ පොල් හිඟය සම්බන්ධයෙන් මාධ්ය හමුවක් ජන අරගල සන්ධානය මගින් කොළඹ ලයන්ස් ක්ලබ්හිදී පැවැත්විණි.
එහිදී ඔහු සඳහන් කළේ පොල් හිඟය සඳහා ස්ථිරසාර විසඳුමක් ලැබෙනතුරු පොල් අපනයනය තාවකාලිකව නැවැත්විය යුතු බවය.
“පහුගිය කාලේ විශාල වශයෙන් රටේ පොල් ඉඩම් වෙන්දේසි වුණා. එක්සත් ජාතික පක්ෂ ආණ්ඩුව තමයි මේ කටයුත්තට විශාල මැදිහත් වීමක් කළේ. අනිත් කාරණය 2019 – 2020 කාලය තුළ ඇති වුණ පොහොර අර්බුදය. මේක නිසා පොල් වගාකරුවන් විශාල අපහසුතාවකට පත් වුණා. එහෙම තත්ත්වයක් ඇතුලෙ තමයි 2020 – 2021 කාලේ සුදු මැස්සා රෝගය පොල් වගාව ආශ්රිතව ව්යාප්ත වුණේ. ඒ වෙලාවේ අපි දිගින් දිගටම කිව්වා සුදු මැස්සා රෝගය ව්යාප්ත වෙන කොට මේකට නිශ්චිතව විසඳුම් අවශ්යයි කියලා. ඒ වෙලාවේ ආණ්ඩුවට කරන්න තිබුණේ හදිසි අවශ්යතාවක් විදිහට සලකලා පොල් වගාව ආරක්ෂා කරගන්න කඩිනම් ක්රියාමාර්ග ගැනීම. නමුත් කිසිම ආණ්ඩුවකට ඒ ගැන කිසිම සැලකිල්ලක් දැක්වුවේ නෑ. මේ සියලු ප්රශ්න සහ යම් දේශගුණික විපර්යාස එක්ක අද වෙද්දී රටේ පොල් අස්වැන්න සීඝ්ර අඩු වීමකට ලක් වෙලා. අද වෙද්දී අපනයන කරන්න තියා ජනතාවට කන්නවත් පොල් ගෙඩියක් නැති තත්ත්වයට පත් වෙලා. මේ අර්බුදය ඇති වෙන්න නියමිතයි කියලා දැනුවත් තත්ත්වයක් ඇතුලෙත් මේ ව්යාපාරිකයෝ පිටරටට කුරුම්බා අපනයනය කරලා විශාල ලාභයක් ලැබුවා. අද වෙද්දී ලංකාවේ පොල් අපනයන ඉල්ලුම මිලියන 800 සිට මිලියන 1400 දක්වා වැඩි වෙලා තියෙන්නේ.”
