kelawalla-boku

පහුගිය දවස් දෙකක් ගාල්ල මාතර ගියා. හයිවේ ගිහිං ගාල්ලෙන් මතුවුණාට පස්සේ මඟ දිගට ඕසෙට මාළු. බලයෝ කෙළවල්ලෝ හුරුල්ලෝ සාලයෝ ඉරටවල්ලෝ අලගොඩුවෝ හැමතැනම ලෑලි උඩ පීනනවා. ඒ අහු අස්සේ උදේ පාන්දර කෝල් කරපු අපේ මාළු කඩේ යාලු මාළු – ‘ගල් මාළු ඇවිත් තියෙනවා. කූරි අටක් තියේ. කිලෝ 04ක් විතර තියෙනවා එකෙක්ගේ. සේරම ඌරු හොටාලා’. ගල් මාළු කියන්නේ මම බලයට පස්සේ ආසම මාළු රස. ඔව්. ඒත් කරන්න දෙයක් නෑ මම ගෙදර නෑ. අරං තියලා කන්න ඕනී ජාතියක් නෙවෙයි ගල් මාළු කියන්නේ. සමහර දවසක බලපිටියට ගියාම පින තියේනම් ආර්නූල් ඇස් තියන් බලන් ඉන්න ගල් මාළු හම්බවෙනවා. ඔව්.. ගල් මාළුවා කියන්නේ පිච්චීමට දුම් ගැසීමට තෙලෙන් බැදීමට අවන් කිරීමට විතරක් නෙවෙයි තුනපහ එක්ක සෙට්වෙලා කරීකරණය වෙන්නත් උපන් හපන් මාළුවෙක්.

කොහොම වුණත් ඔන්න දැන් හැමතැනම දකුණු වෙරළේ මාළු ඕසෙට ගොඩට එන කාලේ. ඉස්සෝ දැල්ලෝ වගේ ජාතිත් දකින්න සුළබයි. මේවා දැක්කොත් අතාරින්න එපා ටිකක් යහමින් ගෙදර අරගෙන යන්න.
අද කතාව මේකයි. අද මාළු ගන්න ගියාම බල ඉන්නවා බලාන. කිලෝඑකම රුපියල් 600යි. ගත්තා. ඊළඟට මූදු කුකුලා ඉම්නවා තන්දූරි කළානම් ගොඩකුකුලා පරාදයි. කිලෝ එක රුපියල් 400යි ගත්තා. පට්ට ගසා ගත්තා. ටිකක් වෙලා යනකොට අපේ මාළු යාලු මට කියනවා – ‘බ්‍රෝ අද තියේ නියම බඩුවක් අරං යන්න’ – මොනාද? මම අහනවා. කෙළවල්ලගෙ තුවක්කුව. පිස්ටල් එක’ මෙහේ තුවක්කුව කියන්නේ ඉතිං බඩුම තමයි. මාළුවාගේ හාටෙකට කියන්නේ තුවක්කුව කියලා. (මම හිතන විදිහට) කෙළවල්ලා කියන්නේ පිටරට යන ජනප්‍රිය මාළුවෙක්. ටූනාවෙක්. ලොකු මාළුවෙක් නිසා ලොකු හාටෙකක්. කිලෝ එකම 1500යි. ගත්තා ඕනී ෆුකක් කියලා. මේක පීකුදු වගේ කෑමක්. පිස්සු පීකුදු වෙන්න කියලා බීර කෑන් දෙකකුත් අරගෙන තුවක්කු කිලෝ එකත් අරන් මම ගෙදර ආවා.

ගෙදර තිබුණා තක්කාලි. තව කොත්තමල්ලි කොළ තිබුණා. කොළ මිරිස් තිබුණා. මට හිතුනා තක්කාලි සොද්දක මේ තුවක්කු ටික සඟවලා පස්සේ දිවට වෙඩි තියන්න. තක්කාලි සුදුළූනු කොළමිරිස් කොත්තමල්ලි කොළ එකට බ්ලෙන්ඩ් කරලා වැඩේ පටන් ගත්තා. පස්සේ තුවක්කුටික මේ ජූසියේ සඟවලා ඊට උඩින් කෑලි මිරිස් දූමකේතුවක් හැලුවා. ඊටපස්සේ පොඩි ගින්දරක් උඩ තියලා නැටෙව්වා.

කෙළවල්ලා කියන්නේ බලයගේ ලොකු අයියා වගේ. බල කියන්නේ මම ආසම මාළුවා. බල ඔලු සොද්ද කියන්නේ පාන් දුසිමක් එක හුස්මට කන්න පුලුවන් සොද්දක්. ඉතිං එහෙව් මාළුවාගේ ඊටවඩා ලොකු එකාගේ තුවක්කුව කියන්නේ ආයේ රස ගැන කවර කතාද? මීන හදවතක් රස රහට උයලා ගන්නවා කියන්නේ ලේසි නෑ.
ඉතිං මාළු ඔලු මාළු හදවත් මාළු බොකු මාළු බිත්තර අහුවුණොත් අතාරින්න එපා. ඒවත් රසටම කන්න පුලුවන් රස කෑම.. එක එක රසට හදාගන්න පුලුවන් මේ හැම එකක්ම. ඉතිං කෙළවල්ලගේ තුවක්කුව කොහේහරි තිබිලා හමුවුණොත් දිවට වෙඩි තියාගෙන බලන්න..!

කේ සංජීව

Similar Posts