මිලකළ නොහැකි නිධානයකින් ලබාගත් බව කියන නිල් මැණිකක් හා දියමන්ති තොගයක් ප්රවාහනය කරමින් සිටි දමිළ ජාතිකයන් දෙදෙනෙකු අත්අඩංගුවට ගෙන අධිකරණයට ඉදිරිපත් කිරිමෙන් පසුව ලබන වසරේ ජනවාරි මස (05දා) දක්වා රක්ෂිත බන්ධනාගාර ගතකරනා ලෙස අනුරාධපුර ප්රධාන මහේස්ත්රාත් අතිරේක දිසා විනිසුරු ජනක ප්රසන්න සමරසිංහ මහතා ඊයේ (29දා) සවස නියෝග කළේය.
මෙසේ රක්ෂිත බන්ධනාගාර ගත කෙරුණේ පම්පමඩු වව්නියාව පදිංචි සන්දන රාජ් ධර්ම රාජා හා වීරපුරම් නෙරියකුළම පදිංචි නටේෂන්කේෂල් රාජ් යන දෙදෙනායි.
සැකකරුවන් අධිකරණයට ඉදිරිපත්කළ මැදවච්චිය පොලිසියේ අපරාධ නඩුමෙහෙයුම් අංශයේ පොලිස් සැරයන් අශෝක ධර්ම රත්න මහතා කියා සිටියේ පොලිස් විශේෂ කාර්ය බලකායේ කැබිතිගොල්ලෑව කදවුරේ සෙබළුන් මැදවච්චිය යකාවැව හංදියේ ස්ථාපිත කළ හදිසි මාර්ග බාධකයකදි සැකකරුවන් දෙදෙනා යතුරු පැදි දෙකක් සමග අත්අඩංගුවට ගෙන ඇති බවයි.
අත්අඩංගුවට ගත් සැකකරුවන් පරික්ෂා කිරිමේදි නිල් පැහැති ග්රෑම් 89 මිලිග්රෑම් 700ක් බර මැණික හා ග්රෑම් දෙකයි මිලිග්රෑම් 250ක් බර දියමන්ති කැබලි 75ක් අත්අඩංගුවට ගෙන තිබෙනා බව සැරයන්වරයා අධිකරණයට දැන්වුවේය.
අත්අඩංගුවට ගෙන තිබෙන මැණික් හා දියමන්ති සත්ය ඒවා බව තහවුරුවි තිබෙනා බවත් ඒවා සැකකරුවන් විසින් නිධානයක් කඩා ලබාගෙන ඇති ඒවා බවට තහවුරුවි තිබෙනා බවත් සැරයන් ධර්මරත්න මහතා අධිකරණයට දැන්වූවේය.
සැකකරුවන් දෙදෙනා එම මැණික් හා දියමන්ති කිසිවෙකුට අලවිකිරීමට රැගෙන යන අවස්ථාවේ පොලිස් විශේෂ කාර්ය බලකායේ අත්අඩංගුවට පත්වි ඇති බවට සැකකරනා බව සැරයන්වරයා අධිකරණයට තවදුරටත් දැන්වූවේය.
අත්අඩංගුවටගත් මැණික් හා දියමන්ති කොළඹ පිහිටි ජාතික ස්වර්ණාභරන අධිකාරියට හා පුරාවිද්යා දෙපාර්තුමේන්තුවට යොමුකර වාර්ථා ලබාගැනීමට පොලිසිය අධිකරණයෙන් ඉල්ලා සිටි අතර එම වාර්ථා ලබාගැනීමට නඩු භාණ්ඩ අදාල ආයතන වලට යොමු කිරීමට විනිසුරුවරයා පොලිසියට නියෝක කළේය.
අනුරාධපුර කොට්ඨාශභාර ජේෂ්ඨ පොලිස් අධිකාරි කීර්ති ලංකා ගීගනගේ මහතාගේ උපදෙස් මත මැදවච්චිය පොලිසියේ ස්ථානාධිපති ප්රධාන පොලිස් පරික්ෂක අනුර බණ්ඩාර මහතාගේ මෙහෙයවීමෙන් අශෝක ධර්මරත්න 7959 මහතා අධිකරණයට සැකකරුවන් ඉදිරිපත් කරමින් කරුණු දැක්වූවේය.
අනුරාධපුර – මහේෂ් විජේසුරිය
