මොරටුව ප්රදේශයේ එගොඩඋයන නව ගාලු පාරේ ජෝසප් පෙදෙස ඉදිරියේ ඇති පදික මාරුවේදී යතුරුපැදියක ගැටී ගැබිනි මවක් සහ ඇයගේ කුඩා දැදැරියන් දෙදෙනෙකු බරපතල තුවාල ලබා රෝහල්ගත කිරීමේදී දැරියන් දෙදෙනා මියගොස් සිටි බවත් ගැබිණි කාන්තාව වැඩිදුර ප්රතිකාර සඳහා කොළඹ ජාතික රෝහලට ඇතුළත් කර ඇති බවද එගොඩ උයන පොලීසිය පැවසීය.
අනතුරෙන් බරපතළ තත්ත්වයේ පසුවු ගැබිනි මවගේ කුස තුළ සිටි දරුවාගේ ජීවිතය බේරා ගැනීමට වෛද්යවරුන් දැඩි උත්සාහයක් ගත්තද එම උත්සාහය ව්යාර්ථ වූ බවත් ගැබිනි මව දැනට දැඩි සත්කාර ඒකකයේ ප්රතිකාර ලබන ඇයගේ තත්ත්වය ද ඉතාම බරපතළ බවත් කොළඹ ජාතික රෝහලේ ප්රකාශකයකු පැවසීය.
අනතුරට පත්වූ ගැබිනි කාන්තාව (24) වැනි වියේ පසුවන අයෙක් බවත් ඇගේ දරු ගැබට මාස 5ක් පමණ වන බවත් මෙම අනතුරින් වයස අවුරුදු 07ක හා අවුරුදු 01ක වයස් කාණ්ඩ වල පසුවූ ඇගේ කුඩා දැරියන් දෙදෙනාද ජීවිතක්ෂයට පත්වූ බවද පොලිසිය පැවසීය.
ගැබිනි කාන්තාව වසරක් වයසැති කුඩා දියණිය එක් අතකින් වඩාගෙන අනෙක් අතින් අනෙක් දියණියද අල්ලාගෙන පදික මාරුවෙන් මාර්ගය හරහා මාරු වීමේදී අධික වේගයෙන් පැමිණි යතුරුපැදිය මෙම පිරිස අනතුරට ලක් කරමින් එම ස්ථානයේ සිට මීටර් 75 ක් පමණ ඉදිරියට ඇදී ගොස් නැවතී ඇත.
ගැබිනි කාන්තාව වඩාගෙන සිටි අවුරුද්දක් වයසැති බිළිදිය මීටර් දහයක් පමණ උඩින් විසිවී බිමට වැටී ඇති බවත් වයස අවුරුදු හතක් වූ දියණිය යතුරු පැදියේ ගැටීමෙන් අනතුරුව මීටර් විස්සක් පමණ ඉදිරියට විසිවී වැටි සිටි බවත් ගැබිනි කාන්තාව කහ ඉර මතම ඇදවැටී ඉතාම අමාරු තත්ත්වයේ පසුව ඇත.
අවට ප්රදේශවාසීන් එක්වී සුවසැරිය 1990 ගිලන්රථ සේවාවට මෙන්ම පානදුර මූලික රෝහලට දුරකථන මාර්ගයෙන් දැනුම් දීමෙන් අනතුරුව අනතුරට ලක්වූ කුඩා දැරියන් දෙදෙනා සහ ගැබිනි කාන්තාව රෝහල් වෙත යැවූ බවත් ඉන් අනතුරුව එගොඩ උයන පොලීසියට දැනුම් බවත් අවට ප්රදේශවාසීන් පැවසීය.
අනතුර සිදුකළ යතුරුපැදිකරු (20) වැනි වියේ පසුවන අයෙකු බවත් මීට සති දෙකකට පමණ ඉහතදී මහජනයාට පීඩාවක් හා අනතුරක් සිදු වන අන්දමින් අපරික්ෂාකාරීව රාත්රියේදී ගාලු පාරේ පානදුර ප්රදේශයේ යතුරුපැදි ධාවන තරග පවත්වමින් හා බයිසිකලේ තනි රෝදයෙන් යෑමෙන් සිටියදී පානදුර දකුණ පොලීසියෙන් අත්අඩංගුවට ගෙන පානදුර අධිකරණයට ඉදිරිපත් කිරීමෙන් අනතුරුව රුපියල් 15000/= දඩ මුදලක් හා තරයේ අවවාද කිරීමක් මත නිදහස්ව පැමිණ සිටින අයෙක් බවත් මෙම පුද්ගලයාගේ නොසැලකිලිමත් යතුරුපැදි ධාවනය හේතුවෙන් මෙම අනතුර සිදුවී ඇති බවත් පොලිසිය පැවසීය.
දිනපතා රාත්රී 12.00 සිට අලුයම 03.00 පමණ වන තෙක් මෙවැනි ආකාරයෙන් අපරීක්ෂාකාරී අන්දමින් මාර්ගයේ ගමන් ගන්නා පුද්ගලයන්ටත් රථවාහන වලට අනතුරු සිදුවන සිදුවන අන්දමින් මාර්ගයේ මෙවැනි පුද්ගලයින් යතුරුපැදි තරග පවත්වන බවත් පොලිසියට කොතෙක් පැමිණිලි සිදුකළත් කිසිදු ඵලක් නොවූ බවත් මෙම තරුණ පිරිසගේ නොමනා ක්රියා ක්රියාකාරකම් නිසාවටිනා ජීවිත දෙකක් හා මෙලොව එළිය දැකීමටපෙර බිළිඳෙකු ගේ ජීවිතය ද අහිමි වූ බවත් ප්රදේශවාසීන් පැවසීය.
අනතුර සිදු වූ අවස්ථාවේදී ප්රදේශවාසීන් හා පොලීසිය අතර උණුසුම්කාරි තත්ත්වයක්ද ඇතිවී තිබූ ආකාරයද දැක ගන්නට හැකි විය.
සැකකරු (05) සෙනසුරාදා දින සවස මොරටුව මහේස්ත්රාත් අධිකරණයට ඉදිරිපත් කිරීමෙන් පසු දෙසැම්බර් (18) දින දක්වා රක්ෂිත බන්ධනාගාර ගත කරන ලෙස මහේස්ත්රාත්වරයා නියෝග කර ඇත.
අනතුර සම්බන්ධයෙන් වැඩිදුර පරීක්ෂණ ගල්කිස්ස ජේෂ්ඨ පොලිස් අධිකාරි රෝහාන් පේමරත්න මහතාගේ අධීක්ෂණය යටතේ එගොඩඋයන පොලිසියේ ස්ථානාධිපති පොලිස් පරීක්ෂක අනිල් මාසකොරාල මහතාගේ උපදෙස් පරිදි රථවාහන අංශයේ වැඩබලන ස්ථානාධිපති පොලිස් කොස්තාපල් 61808 ඒ.කේ.ඩී.එන් අරුණසිරි මහතාගේ උපදෙස් පරිදි පොලිස් කොස්තාපල් 67236 දසනායක .82659 අලහේන්ගොඩ නිලධාරීන් විසින් සිදුකරනු ලබයි.
සමීර අබේසිංහ – බොරලැස්ගමුව
