රට දියුණු කිරීමට නම් දේශපාලකයා මෙන්ම ජනතාවත් බුද්ධිමත්ව කටයුතු කළ යුතු යැයි එක්සත් මහජන පක්ෂයේ නායක, මහජන ආරක්ෂක ඇමැති ටිරාන් අලස් මහතා පැවැසීය. ඇමැතිවරයා මේ බව පැවැසුවේ නුවරඑළිය නගර ශාලාවේ පැවති එක්සත් මහජන පක්ෂයේ නුවරඑළිය දිස්ත්රික් සමුළුවේදී අදහස් දක්වමිනි.
එහිදී වැඩිදුරටත් අදහස් දැක්වූ ඇමැතිවරයා මෙලෙස ද කීවේය.
“ලොකුම අභියෝගය තමා කුඩු සහ පාතාලය තුරන් කර, රටේ තරුණ ප්රජාව ආරක්ෂා කර යහපත් තරුණ ප්රජාවක් නිර්මාණය කිරීම. අපි දැන් ඒක සාර්ථකව කරගෙන යනවා. එදා තිබූ කුඩු ප්රමාණය අද නෑ. එදා හැමදාම වෙඩි තැබීම් වාර්තා වුණා. ඒත් දැන් එහෙම නෑ. ඒ ඔක්කොම යහපත් අතට හැරුණේ යුක්තිය මෙහෙයුම හරි විදිහට කර වැරදිකරුවන් අත්අඩංගුවට අරන් නීතිය ක්රියාත්මක කළ නිසයි. නව දේශපාලන ක්රමවේදයක් හරහා ජාති, ආගම් භේදවලින් තොරව ප්රතිපත්තියක් ඇතිව රට ගොඩදාන්න තමා එක්සත් මහජන පක්ෂය එක්ක අපි කරන්න යන්නේ.
සමහර දේශපාලන පක්ෂ අනිසි ලෙස මහජනතාව පාවිච්චි කළාට ජනතාවට කිසිම හොඳක් වෙන්නේ නෑ. මහජනයා රවට්ටලා ඡන්දෙ අරන් දේශපාලකයන් වැජඹෙනවා. අපි පක්ෂයක් හැටියට කවදාවත් එහෙම කරන්නේ නෑ. මහජනතාවට යහපතක් කිරීම තමයි අපේ පක්ෂයේ මූලික අරමුණ. කා එක්කද වැඩ කරන්නේ කියලා මම සහ අපේ පක්ෂය තීරණය කරන්නේ එයා දූෂණයෙන් තොර එක්කෙනෙක් නම් සහ වැඩක් කරන්න පුළුවන් කෙනෙක් නම් විතරයි. මම මහජනතාවගෙන් ඉල්ලන්නේ අපත් එක්ක එකතු වෙන්න කියලයි.”
එක්සත් මහජන පක්ෂයේ නුවරඑළිය දිස්ත්රික් සමුළුවට එහි දේශපාලන කටයුතු ලේකම් හේමප්රිය කවිරත්න, පක්ෂ පාලක කමිටු සාමාජිකයෝ, නුවරඑළිය දිස්ත්රික් සංවිධායක පද්මනාදන් රාජේන්දන් සහ දිස්ත්රික් සංවිධායිකා නදීකා යන මහත්ම මහත්මීන් ඇතුළු පිරිසක් සහභාගී වූහ.
