හැරගිය පෙම්වතිය රීරි යකාට බාර කරන ‘රතු නිවිති හූනියම’

red

තමන් හා විවාහ වන බවට පොරොන්දු වී කලක් පෙමින් වෙළී සිටි තරුණියක හිටිහැටියේ වෙනත් තරුණයෙකු හා විවාහ වීම දැරිය නොහැකි වේදනාවක් බවට සැක නැත. ඉන් එම තරුණයා තුළ තදබල දුකක් සංවේගයක් සේම එම තරුණිය කෙරෙහි බලවත් වෛරයක් හටගැනීමට ද පුළුවන.

එවන් විටෙක එම වෛරය පිරි මසාගැනීමට ඇතැම් පෙම්වතුන් විසින් සිදුකරනු ලබන ගුප්ත පලිගැනීමක් පිළිබඳ තොරතුරු තවමත් අපගේ ගැමි සමාජයෙන් උකහාගත හැක. ගැබිනි මව්වරුන් ඇතුළු බාල, තරුණ, මහළු කාටත් එක සේ ගුණදායක බව පැවසෙන කොළ එළවලුවක් වන නිවිති බෝගය මුල්කොට සිදුකරනු ලබන මෙය හැඳින්වෙනුයේ ‘රතු නිවිති හූනියම’ යනුවෙනි.

එම ගුරුකමේ අරමුණ කෙතරම් කෲර හා අමානුෂික වුවත් එය සිදුකරන ආකාරයේනම් කිසියම් රසවත් බවක් තිබේ. ඒ මෙලෙසිනි.

දැනට අප රටේ දක්නට ලැබෙන නිවිති වර්ග දෙක අතුරින් කොළ නිවිති හෙවත් යෝධ නිවිති හැරුණුකොට දක්නට ලැබෙන සෙසු නිවිති වර්ගය රතු නිවිති ය. ඇතැම් ප්‍රදේශවල ‘යක් නිවිති’ ලෙස ද හැඳින්වෙන මෙය, අනෙක් නිවිති වර්ගය මෙන් ජනප්‍රිය නැත. ඒ සඳහා වන විශේෂ හේතුවක් කිසිවෙකු හෙළිකර නැතත් රතු නිවිති යනු ‘හූනියම් බඩුවක්’ ලෙසට පැතිර පවත්නා විශ්වාසය නිසා බව සහතික වන්නට මට පුළුවන. ඒ උතුරුමැද, මධ්‍යම හා සබරගමුව යන පළාත් ආශ්‍රිතව ම`විසින් කරනු ලැබූ විමසුමකදී ‘රතු නිවිති හූනියම’ හා සම්බන්ධ බොහෝ තොරතුරු අනාවරණය කරගත හැකි වූ බැවිනි.

හුදෙක් වැඩිවියට පත්වීමේ සිට මාස් ශුද්ධියේ අවසානය හෙවත් අර්ථවහරණය (Menopause)තෙක් වන තරුණියන් හා මැදිවියේ කතුන් පමණක් ඉලක්ක කොට සිදු කෙරෙන මෙම ‘රතු නිවිති හූනියම’ කුඩා දැරියන්, ආර්ථවහරණය සිදුවූ වියපත් කතුන් සේම පුරුෂ පාර්ශවය සම්බන්ධයෙන් කෙසේවත් බලාත්මක නොවේ. එමෙන්ම එය සිදුකිරීම සඳහා යකැදුරෙකුගේ සහාය ලබාගත යුතුම ය. ඒ එම කාන්තාව ‘රීරි යකාගේ’ බැල්මට නතු කරවීමට ය. රීරියකා යනුවෙන් හැඳින්වෙන යක්ෂයාගේ ‘රීරි’ නාමය රුධිරය යන්න හැඟවෙන ‘රුහිරු’ යන්නෙන් බිඳී ආ එකකි.

මෙම ‘රතු නිවිති හූනියම’ සඳහා අවශ්‍ය වනුයේ රතු නිවිති කොළ අත්තක් සහ රතු, කහ සහ සුදු පැහැයෙන් යුතු නූල් පොටවල් තුනක් පමණි. පළමුව ඒ සඳහා තෝරාගනු ලබන යකැදුරා ලවා ඒ නූල් තුන එකට අඹරවා කිසියම් මන්ත්‍රයකින් එය ජීවම් කරගත යුතු ය. එහෙත්, ඒ මන්ත්‍රය කුමක්දැයි සොයාගැනීමට බලවත් සේ වෙහෙසුණු මට අවසානයේ සෑහීමකට පත්විය හැකි පිළිතුරක් ලබාදෙන ලද්දේ හසලක, වරාගොල්ලේ අරඹගේ ජයවර්ධන කපු මහතා විසිනි. රීරියක් දැහැන යනුවෙන් හැඳින්විය හැකි එම ජීවම තමන්ද අසා දැන හිඳින මුත් කිසිවකුටත් අවැඩක්, නපුරක් සිදුකරන දේකට තමන් වචනයකින්වත් සහයෝගයක් නොදෙන බව හෙතෙම කීය.

“ඕං නමෝ රුදුරු ලේ විලෙන් උපන්, ලේ කැටියෙන් උපන් වලාහක රීරි යක්ෂයා… අවමංගල්ලේ යාළුවා…” ආදී වශයෙන් එම රීරි යක්ෂයා කැඳවීමේ මන්ත්‍රය ඇරඹෙන බව ඔහු කියා සිටියේ මාගේ බලවත් පෙරැත්තය නිසාම ය. එමෙන්ම මෙම හූනියම සඳහා වෙනත් ප්‍රදේශවල මීට වෙනස් මන්ත්‍ර ද ජීවම් කෙරෙන බව මට දැනගත හැකි විය.

මෙසේ රීරියක් දැහැනින් ජීවම් කෙරෙන එකට ඇඹරූ රතු, කහ, සුදු යන පාටවලින් යුතු නූල් තුන පළමුව එම හූනියමට ලක්කෙරෙන තරුණියට හෝ කාන්තාවට පෑගෙන්නට හෝ එයට උඩින් පැනයාමට ඉඩ සැලැස්විය යුතුය. ගුප්ත ශාස්ත්‍රවල මෙය හැඳින්වෙනුයේ ‘යටි පහු කිරීම’ යනුවෙනි.

පසුව එම තරුණියට හෝ කාන්තාවට මාස් ශුද්ධිය සිදුවන වකවානුවක් බලා මරු ගේ හෝරාවකින් එම නූල්පට රතු නිවිති අත්තක ඔතා වක්කඩක් වැනි ගලායන දිය පහරක් යට සැඟවිය යුතුය. ඉන්පසු එම වක්කඩෙන් වතුර ගලායන තුරාවටම එම තරුණිය හෝ කාන්තාව වෙතින් නිරන්තර යෝනිමය රුධිර වහනයක් සිදුවේ. මෙලෙස මාස් ශුද්ධියේදී අධික ලෙස රුධිරය පිටවීම (Menorrhagia) ලේ මාලය යනුවෙන් ද අක්‍රමවත් මාස් ශුද්ධිය (Metrorrhagia) හෙවත් යෝනි මාර්ගයෙන් නිරන්තරව රුධිරය පිටවීම කිලිමාලය යනුවෙන් ද ගුප්ත ශාස්ත්‍රයන්හි සඳහන් වෙයි. මෙම තත්ත්වයන් දෙකේදීම පළමුව එම කාන්තාවගේ ලිංගික ජීවිතය අඩාල වන අතර, පසුව දිගු කාලයක් මෙම තත්ත්වයන් අඛණ්ඩව හා නිරතුරුවම පැවතීම මගින් ඇගේ මරණය පවා සිදුවිය හැක. එමෙන්ම තම පුතු ගෙනා ලේලිය පිළිබඳව විවිධ හේතූන් මත තදබල වෛරයෙන්, ද්වේශයෙන් පසුවන නපුරු නැන්දම්මලා ද මෙම ‘රතු නිවිති හූනියම’ කරවන බව මෙම විමසුමේදී මට දැනගත හැකි විය.කෙසේ හෝ මෙය කාන්තාවකගේ මාස් ශුද්ධිය ඉලක්ක කොට සිදු කෙරෙන්නක් නම් මෙය ඔවුන්ගේ සමීපතමයන්ට පමණක් කළ හැකි හූනියමක් බව නිසැක ය.

එමෙන්ම මෙම රතු නිවිති හූනියම ගුප්ත ශාස්ත්‍රීය පදනම වනුයේ රීරි යක්ෂයාට කැප කළ තුන් පැහැයේ නූල් කැබැල්ල යටි පහු කරන තරුණිය හෝ කාන්තාව කෙරෙහි රීරි යක්ෂයාගේ ඇල්ම, බැල්ම යොමුවීම ය. අප රටේ සෙසු යකුන්ට සාපේක්ෂව රීරි යකා රුධිරය කෙරෙහි අසීමාන්තික ලොල් බවක් දනවන අමනුෂ්‍යයෙකි. මෙලෙස මිනිස් ලෙයට ලොල් යකුන් පිළිබඳ විශ්වාස ලොව පුරා පවත්නා අතර පොදුවේ එම යක්ෂයා හැඳින්වෙනුයේ Blood demon යනුවෙනි.

“ඔය විශ්වාසය හින්දා සමහරු රතු නිවිති තමන්ගේ ගෙවත්තේ තියාගන්නත් බයයි. ඒවට රීරි යකාගේ බැල්ම වැටෙයි කියලා. නමුත් මම නම් මීට අවුරුදු ගාණකට කලින් අනුරාධපුරේ තිරප්පනෙන් ගෙනාව රතු නිවිති පැළයක් අපේ ගෙවත්තේ හිටවා ගත්තා. ඒ වගේම ඒක බොහොම සාරෙටත් හැදුණා. ඒ විතරක් නෙවෙයි ඒක අවුරුදු කීපයක් තිස්සෙම අපේ පවුලේ කෑම බීමවලට එකතු කරගත්තා. ඒත්, අපේ පවුලට නම් ඔය කියන කිසිම දෙයක් වුණේ නැහැ. අනික ඒ ගුරුකමේ හැටියට රීරි යක්ෂයා බැල්ම හෙලනවාය කියන්නේ ඔය ජීවම් කරන පාට තුනේ නූල්වලට මිසක් රතු නිවිතිවලට නෙවෙයිනේ. ඒ හින්දා රතු නිවිතිවලට බයවෙන එක පතොරොම නැති තුවක්කුවකට බය වෙනවා වගේ වැඩක්.”

මෙම විමසුමේදී අප හා අදහස් පළකළ සීතාවක ජනශ්‍රැති පිළිබඳ විශාරද වරයෙකු වන අවිස්සාවේල්ල, මානියංගම බණ්ඩාරවත්තේ හිටපු උප්පැන්න, මරණ සහ විවාහ ලේකම් අයි.ඩී.ඒ.ජී. ධනපාල මහතා කීය.

“හැබැයි ඒ කාලේ බේත් බඩුවලට කියලා ඔය රතු නිවිති අතු ගෙනියන්න පිට පළාත්වලින් හිටන් මිනිස්සු ආවා. ඒත් මම ඇහුවෙ නෑ මොකටද කියලා. අනික මම දන්නවනේ මම එහෙම ඇහුවත් ඒ මිනිස්සු බොරු වුණත් කියන්න පුළුවන් කියලා. ඉතින් මම මොකටද විහින් බොරුවලට රැවටෙන්නේ?” ධනපාල මහතා කීය.

“හැබැයි ඉතින් රතුපාට දේවල්වලට රීරි යකාගේ බැල්ම තියෙනවා කියන ජන විශ්වාසය අනුව ඔය රතු නිවිතිවලටත් ඒ රීරි යක්ෂ බැල්ම තියෙනවා කියලා සමහරු හිතනවා ඇති නේද?” අවසානයේදී මම ඇසීමි.

“එහෙනම් ඊට කලින් රීරි යකා බීට්රූට්වලට බැල්ම හෙලන්න එපායෑ.” ධනපාල මහතා කීයේ සිනාසෙමිනි.

ඒ කෙසේ හෝ තමන්ට පිටුපා වෙනතක ගිය පෙම්වතියන් සහ ඔවුන් විවාහ කරගත් සැමියන් මරාදැමීම පිණිස අවි අමෝරන යුගයක තමන්ගේ පලිගැනීමේ චේතනාව මෙවන් ගුප්ත, මිථ්‍යා විශ්වාසයක් තුළින් හෝ දියකර හැරීමේ එතරම් දොසක් නැතැයි මට සිතෙයි. මක්නිසාද වෛරී චේතනාව දරා සිටින පුද්ගලයාට මිස වෛරයට ලක්වන කාන්තාවට අවැඩක් කිරීමට කිසිඳු පදනමක් නැති ගුරුකමකට කළ හැකි දෙයක් නොමැති නිසා සහ ඒ මඟින් පළිගැනීමේ චේතනාව සහිත පුද්ගලයාගේ ද්වේශය තාවකාලිකව හෝ යටපත් වුවද. ඉන් කිසිවෙකුටත් ශාරීරික හානියක් නොමැති නිසා එවැනි ක්‍රියාවන් මඟින් සමාජයේ සාපරාධී ක්‍රියා අවම වනු ඇත. නමුත් වෛරය පෙරදැරිව සිදුකරන මේ ගුරුකම් හදි හූනියම්වලින් වෛරී චේතනාව සහිත පුද්ගලයාට එම චේතනාව නිසා සිදුවන මානසික දූෂණයත් ඉන් ඇතිවන මානසික පීඩනයත් හැරුණුකොට ලබාගත හැකි වෙනයම් ප්‍රතිලාභයක් නම් නැත.

තිලක් සේනාසිංහ

Related posts