කාංචනගේ ඉලක්කම් සහ රේගුවේ දත්ත අතර පරස්පරයක්

ලංකාවට පෙට්‍රල් සහ ඩීසල් ගොඩබාන මිල ගැන තෙල් සංස්ථාවත්, ඛනිජ තෙල් අමාත්‍යාංශයත් කියන්නේ පට්ටපල් බොරුය. ලංකාවට පෙට්‍රල්/ඩීසල් ගොඩබාන මිල අතර රු. රු. 130 සිට රු. 150 ක් දක්වා අතර පරතරයක් ඇත.

මේ දත්ත ඇමති කාංචන විජේසේකර ගේ ටුවිට් එකේ ඉලක්කම් සහ රේගුවේ දත්ත අතර සංසන්ධනයකි.

ඛනිජ තෙල් ඇමතිගේ පණිවුඩයේ ‘Landing cost per liter in Rs.’ (ලීටරයක් ගොඩබාන මිල) යැයි තීරුවක් ඇත. එය, පෙට්‍රල් 92 රු. 363.51 ක් ද, පෙට්‍රල් 95 රු. 367.18 ක් ද, ඔටෝ ඩීසල් රු. 403.65 කි. ලංකාව තෙල් ගන්නේ මේ මිලට නොවන බව ලෝක තෙල් මිල ගැන අවබෝධයක් ඇති සියළු දෙනා දන්නේය. (වගුව බලන්න)

ඇමති කාංචන කියන මේ Landing cost per liter in Rs. සත්‍යයක් නොවේ. එය ශ්‍රී ලංකා රේගුව මගින් තහවුරු කර ගත හැකිය. තෙල් ගෙන්වන්නේ සංස්ථාවයි. මුදල් ගෙවන්නේ මහා භාණ්ඩාගාරය යි. රාජ්‍ය අංශයේ ආයතනයක් නිසා අඩුවෙන් මිලදැක්වීමට (Under Value) අවස්ථාවක් නැත. බදු මිල තීරණය කරන්නේ රේගුවයි.

ඇමතිට අනුව, 92 පෙට්‍රල් ලීටරයක් ගොඩබාන මිල, රු. 363.50 කි. ඇත්ත මිල රු. 228.26 කි. ඇමතිගේ ගාන රු. 135 ක් වැඩිය.

ඇමතිට අනුව, 95 පෙට්‍රල් ලීටරයක් ගොඩබාන මිල, රු. 367.18 කි. ඇත්ත මිල රු. 235.23 කි. ඇමතිගේ ගාන රු. 132 ක් වැඩිය.

ඇමතිට අනුව, ඔටෝ ඩීසල් ගොඩබාන මිල රු. 403 කි. ඇත්ත මිල, රු. 255 කි. ඇමතිගේ ගාන රු. 150 ක් වැඩිය.

ඉන්ධන මිල ඉහළ දැමීම සාධාරණීකරණය කරන්නට ඛනිජ තෙල් ඇමතිවරයා ඉදිරිපත් කර ඇති බදු පිළිබඳ සංඛ්‍යා ලේඛන ද සත්‍යය මිලට වඩා වැඩි මිලක් දක්වා ඇත.

ආණ්ඩුව පෙට්‍රල් 92 ට රු.59.26 ක් බදුගසන බව ඇමති කියයි. ඇත්ත ගාන රු. 49.12 කි.

පෙට්‍රල් 95 ට රු. 80.54 ක් බදු ගසන බව ඇමති කියයි. ඇත්ත ගාන රු. 49.64 කි.

ඔටෝ ඩීසල් බද්ද, රු. 36 ක් බව ඇමති කියයි. ඇත්ත ගාන රු. 19.19 කි.

මේ ආණ්ඩුව පෙට්‍රල් 92 ලීටරයකින් රු. 161 ක් ද, පෙට්‍රල් 95 ලීටරයකින් රු. 232 ක් ද, ඩීසල් ලීටරයකින් රු. 157 ක් ද ලාබ ලබයි. මෙය බදු ගෙවූ පසුව ලබන ලාභයකි.

කෝප් කමිටුව සහභාගි වූ මහින්ද අමරවීර අමාත්‍යවරයා ඇතුළු කිසිවෙකුට මේ කියන සරළ කතාව එක්කෝ තේරුණේ නැත. ඔවුන්ට අවශ්‍ය වූවේ, මහජන උපයෝගීතා කමිටුවේ සභාපතිවරයා බොරු කියන බව පෙන්වීම ය.

ඇමති කාංචන විජේසේකර කියන ගානට තෙල් තියෙන්නේ සිංගප්පුරු මිල දර්ශකයේ ය. ලංකාව තෙල් මිලදී ගෙන ඇත්තේ ඒ මුදලට නොව, එයට වඩා අඩු මුදලකටය. මේ සරළ කතාව කෝප් කමිටුවට පමණක් නොව තමන් මේ ගැන දන්නේ නැතැයි කියන ‘මහජන උපයෝගීතා කොමිසමේ සාමාජිකයින්ට‘ පවා තේරී නැත. නැතිනම්, මේ කතාව හොඳින්ම දැන, මෙරට පාරිභෝගිකයා දැවැන්තම පික්පොකට් ගැසීමට ලක් කරන්නේය.

වැදගත්මක කරන නම්, දැන් සංස්ථා තෙල් මිලත්, ඉන්දියන් තෙල් මිලත් එක හා සමානය. ලංකාවේ ජනතාව රවටන්න හදන සුත්‍රය අනුව, ඉන්දියන් සමාගම ලාබ ලබයි.
සංස්ථාවට ඩොලර් තබා රුපියල්වත් නැති නිසා ආණ්ඩුව සල්ලි අච්චු ගසන බව මහ බැංකු අධිපති කියයි. එහි ප්‍රතිඑලය සෑම භාණ්ඩයකම මිල ඉහළ යාමය. ඛනිජ තෙල් මාෆියාව විසින් මේ රටේ පාරිභෝගිකයා හූරා කමින් තම මඩිය තර කර ගැනීම වැලැක්වීමට රටම එක් විය යුතුව ඇත.

(අමාත්‍යවරයා ගේ ටුවිට් පණිවුඩයේ දත්ත හා රේගු දත්ත අතර සංසන්නය ත්, ඇමතිවරයාගේ ටුවිට් පණිවුඩයත් මේ සමඟ අමුණා ඇත)

රජිත් කීර්ති තෙන්නකෝන්

දකුණ හා මධ්‍යම පළාත් හිටපු ආණ්ඩුකාර

Related posts