එක්සත් ජාතීන්ගේ සංවිධානය විසින් මානව හිමිකම් විශ්ව ප්රකාශණය ලොවට හදුන්වා දී 2024 දෙසැම්බර් 10 වන දිනට වසර 76ක් සම්පුර්ණ වේ. 1965 වසරේ දී මෙම විශ්ව ප්රකාශනය සදහා ශ්රී ලංකා රජයත් අත්සන් තබා එම විශ්ව ප්රකාශණයේ සදහන් සමහර කොටස් අපගේ ආණ්ඩුක්රම ව්යවස්ථාවට (1978) එකතු කර ඇත්තේ එම අයිතිවාසිකම් කිසිවෙකුට අභියෝගයට ලක්කල නොහැකි ජනතාවගේ මූලික අයිතිවාසිකම් ලෙස සදහන් කරමිනි.
එක්සත් ජාතීන්ගේ විශ්ව ප්රකාශනයේ 5 වන වගන්තියේ සදහන් “කිසියම් රාජ්ය පාර්ශවයක් විසින් කිසියම් තැනැත්තෙකු වදහිංසාවට හෝ කෲර, අමානුෂික හෝ අවමන් සහගත සැළකිල්ලකට නැතහොත් දඩුවමකට යටත් කිරීම” යනුවෙන් සදහන් වගන්තිය අපගේ ආණ්ඩුක්රම ව්යවස්ථාවේ 11 වන ව්යවස්ථාවට මුළුමනින්ම ඇතුලත් කර ඇත්තේ වදහිංසාවට එරෙහිව ශ්රී ලංකාවේ රජ්ය ද අනෙකුත් රාජ්ය මෙන් කටයුතු කරන බවට දුන් සහතිකයක් ලෙසය.
මේ අතර, වදහිංසාවට එරෙහිව තවත් වැදගත් පනතක් 1987 ජුනි 26 වන දින ඒක්සත් ජාතීන් විසින් සම්මත කරන ලදී. එය වදහිංසාවට සහ අනෙකුත් කෲර, අමානුෂික හෝ අවමන් සහගත සැලකීම්වලට එරෙහි එක්සත් ජාතීන්ගේ සම්මුති පනත ලෙස හැදින්වේ.
එම පනතට 1994 ජනවාරි 03 වන දින ශ්රී ලංකා රජය ද අත්සන් කර තිබේ. ඉන් නොනැවතුණු ශ්රී ලංකා රජය වදහිංසාවට සහ අනෙකුත් කෲර, අමානුෂික හෝ අවමන් සහගත සැලකීම්වලට එරෙහි 1994 අංක 22 දරණ ඒක්සත් ජාතීන්ගේ සම්මුති පණත 1994 නොවැම්බර් 25 දින විශේෂ පනතක් ලෙස පාර්ලිමේන්තුවේ සම්මත කර ගන්නා ලදී. එම නීතිය 1994 දෙසැම්බර් 20 වන සිට ශ්රී ලංකාවේ බලාත්මක වූයේ වදහිංසාවට සහ අනෙකුත් කෲර, අමානුෂික හෝ අවමන් සහගත ලෙස ශරීරිකව හෝ මානසිකව සැලකීම අපරාධ වරදක් බවට පත්කරමිනි. එවැනි ක්රියාවකට එරෙහිව හත්අවුරුද්දකට නොඅඩු සිරදඩුවමකට හා රුපියල් 50,000 කට නොඅඩු දඩයකට යටත්කර තිබේ.
ඒ අනුව, ශ්රී ලංකාව රාජ්ය තුළ කෲර වදහිංසාව ජනතාවගේ මූලික අයිතිවාසිකම් කඩකිරීමක් බවටත්, අපරාධමය වරදක් බවට පත් කර තිබේ. ඒ අනුව මූලික අයිතිවාසිකම් ආණ්ඩුක්රම ව්යවස්ථාවට ඇතුලත් වී දැනට වසර 46 ගතව ඇති අතර, වදහිංසාව අපරාධමය වරදක් බවට පත් කර 2024 දෙසැම්බර් 20 වන දිනට වසර 30 සම්පුර්ණ වේ.
නමුත්, මානව හිමිකම් ආරක්ෂා කර දීම සදහා මෙතරම් සුවිසල් නීති පද්ධතියකට හිමිකම් කියන ශ්රී ලාංකිකයින්ට දශක ගනනාවක සිට නීතිඥාණුකූලව ලැබී ඇති තම අයිතිවාසිකම් පූර්ණ වශයෙන් ආරක්ෂාකර ගැනීමට මෙතෙක් නොහැකි වීමට හේතුව කුමක්ද? එය පැවති ආණ්ඩු හෝ පවතින ආයතන පද්ධතින් හා නිලධාරීන්ගේ තිබෙනවා යැයි පැවසෙන ප්රශ්ණයක් පමණක්ද? අදට යෙදී තිබෙන ජාත්යන්තර මානව හිමිකම් දිනයේ සැමරුවේ සිට ඉදිරියට මේ මාතෘකාව පිළිබදව අප පුළුල් සංවාදයක් ආරම්භ කල යුතුය.
මේ අතර, එක්සත් ජාතීන්ගේ 76 වන ජාත්යන්තර මානව හිමිකම් දිනය නිමිත්තෙන් ශ්රී ලංකා මානව හිමිකම් කොමිෂන් සභාව විසින් ඊයේ දින (10) විශේෂ උත්සවයක් කොළඹ, බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේ (BMICH) පැවැත්වීමට නියමිතව ඇති බව වාර්තා වේ.
එමෙන්ම, අද දෙසැම්බර් 11 දින, මානව හිමිකම් ආරක්ෂා කිරීම වෙනුවෙන් වෙනස්වෙමු තේමාව යටතේ රයිට් ටු ලයිෆ් මානව හිමිකම් මධ්යස්ථානය හා වදහිංසාවට එරෙහි ශ්රී ලංකික එකමුතුව විසින් සංවිධානය කරන මානව හිමිකම් දින සැමරුමක් හා ප්රකාශන එලිදැක්වීමක් බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේ පැවැත්වීමට නියමිතව තිබේ.
