Day: June 29, 2022

කන්දකාඩු පුනරුත්තාපන මධ්‍යස්ථානයේ සිටි රැඳවියන් 600ක් පමණ අද (29) අලුයම එයින් පළා ගොස් ඇති බව වාර්තා වේ. අප කළ විමසීමක දී, පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරි නිහාල් තල්දුව මහතා පැවසුවේ ඉන් එක් අයෙක් මියගොස් ඇතැයි වාර්තා වන අතර, එම ස්ථානයට ළඟාවීම අසීරු වී ඇති බවය.

ලබන මස 1 වනදා සිට ක්‍රියාත්මක වන පරිදි සියයට 30කින් බස් ගාස්තු ඉහළ නැංවීමට අදාළ නිර්දේශ ජාතික ගමනාගමන කොමිෂන් සභාව මගින් ප්‍රවාහන අමාත්‍යවරයා වෙත අද දිනය තුළ යොමුකිරීමට නියමිත යි. ඉන්ධන අර්බුදය හමුවේ අද(29) දිනයේ දිවයින පුරා ධාවනය වන්නේ සමස්ත පෞද්ගලික බස් රථ සංඛ්‍යාවෙන් සියයට 10ක් පමණක් බවයි ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා ප්‍රකාශ කළේ.

ඉන්ධන හල් තුල පෙට්‍රල් නොමැතිවුවද පෙට්‍රල් ලැබෙතැයි අපේක්ෂාවේන් රථ වාහන විශාල ප්‍රමාණයක් 29වන දිනද පෝලිමේ තබා ගෙන සිටින අයුරු දක්නට හැක. ඉන්ධන හල්වල පෙට්‍රල් නොමැති බව සදහන් කර එම ඉන්ධන හල් වාසා ඇති අතර එම ඉන්ධන හල්වල ආරක්ෂාව සදහා පොලිස් හා යුධ හමුදා නිලධාරින්ද යොදවා ඇත. මනුර සුදත් සෙල්ලහේවා

ලංකා ඛණිජ තෙල් නීති ගත සංස්ථාවේ කොලොන්නාව තොග ගබඩාවෙන් ඉන්ධන නිකුත් කිරීම සම්පූර්ණයෙන්ම නතර කර තිබෙනවා. ටෝකන් පත් නිකුත් කළ පුද්ගලයින්ට ඉන්ධන බෙදා හැරීම ජුලි මස 10 වනදායින් පසුව ආරම්භ කරන බැවින් එතෙක් පෝලිම්වල රැදී නොසිටින්නැයි ඛණිජ තෙල් නීතිගත සංස්ථාව ජනතාවගෙන් ඉල්ලීමක්ද කළා. මුතුරාජවෙල පර්යන්තයෙන් ඉන්ධන නිකුත් කරණු ලබන්නේ අත්‍යාවශ්‍ය සේවා සදහන් පමණක් බවයි එහි උසස් නිලධාරියෙකු සදහන් කළේ. මේ අතර ඉන්ධන ලබාගැනීමට තවදුරටත් පෝලිම්වල රැදී නොසිටින ලෙස ලංකා ඛණිජ තෙල් ටැංකි රථහිමියන්ගේ සංගමය ද ජනතාවගෙන් ඉල්ලීමක් කළා.