ඉදිරියේදී රටේ ඇති විය හැකි ආහාර අර්බුදයට විසඳුමක් වශයෙන් මාතර දිස්ත්රික්කයේ සෑම බිම් අඟලකම කුමන හෝ භෝග වර්ගයක් වගා කිරීමට මාතර දිස්ත්රික් ලේකම් වයි.වික්රමසිරි මහතාගේ මැදිහත්වීමෙන් වැඩපිළිවෙළක් සකස් කර තිබේ. ඒ සඳහා සියලු පාර්ශ්ව දැනුවත් කර ඔවුගේ සහාය ගැනීමට නියමිතය.
ඊට සමගාමීව මාතර දිස්ත්රික්කයේ ක්රියාත්මක රාජ්ය නොවන සංවිධාන හා ස්වේච්ඡා සිවිල් සංවිධාන දැනුවත් කර මේ වෙනුවෙන් ඔවුගේ දායකත්වය ගැනීම සඳහා වූ වැඩසටහනක් පසුගියදා මාතර දිස්ත්රික් ලේකම් කාර්යාලයීය ගාමිණී ජයසේකර ශ්රවණාගාරයේ දී පැවැත්විණි.
එහිදී වැඩිදුරටත් දිසාපතිවරයා මෙසේද කීය.
හෙට දවසේ මොනවා වෙයිද කියන එක ගැන අපට හැඟීමක් නැති වෙමින් තිබේ. ඒ නිසා මේ වෙලාවෙ අපට යම් යම් ක්රියාමාර්ගවලට එන්න සිදු වෙනවා. මේවා පිළිබඳව දිගින් දිගට විවේචනය කර කර ඉන්න අපටත් පහසුයි. ඔබටත් පහසුයි. නිලධාරීන්ටත් පහසුයි. ජනතාවටත් පහසුයි. උද්ඝෝෂණ කරන්නත් ලේසියි. ගිහිල්ල කොහේ හරි කෑගහන එක. එහෙම නැතිනම් මේක විවේචනය කරන්න හරි ලේසියි. සමාජ මාධ්යවලට දාන්න පුළුවන්. හැබැයි ඒ ඔක්කොම කරලා රටට මොනවද ලැබෙන්නේ.රටට මොකුත් ලැබෙන්නේ නැහැ. ඒ තුළින් සිදුවන්නේ තවත් නාස්තියක් සහ විනාශයක් පමණයි. එහෙමනම් දැන් අපට සිදු වෙනවා මීට එහාට ගිහිල්ලා අද දවසේ යම් කටයුත්තක් කරන්න. අපට මේක කවුරුත් කියනකම් ඉන්න බැහැ. කවුරුත් කියන නිසා කරන්න අවශ්යත් නැහැ.
අපට මහා ලොකුවට තවම නොදැනුණත් බඩගින්න කියන එක වෙනදාට වැඩිය ඉස්මතු වෙමින් තිබෙනවා. තව මාස තුනක් යනකොට අපට ආහාර හිඟයක් ඇති වෙනවා.මේක යථාර්ථයක්. මේක මහ පොළොවේ යථාර්ථයක් වෙනවා. අද වෙනකොටත් සමහර පවුල් දවසට එක වේලක් කන තත්ත්වයට පත් වුණා නම් ඔබ අප ඇතුළු සියලු දෙනාම වෙනදා ගත්ත ආහාර වේලෙන් භාගෙකින් සෑහීමකට පත්වෙන්න අපි කවුරුත් පෙලඹුනා නම් මේ තත්ත්වය ගැන අමුතුවෙන් කියන්න දෙයක් නැහැ. ඒ නිසා අපට කරන්න තියෙන්නේ කෘෂිකාර්මික ක්ෂේත්රයේ යම්කිසි කෙටි කාලීන නිෂ්පාදන සඳහා යොමුවීමයි.
තමරසිරි විජේසේකර – දෙයියන්දර සමූහ යුවන්ත නෙත්සර – මුලටියන විශේෂ
